Suki sa pamalikas

Dear Tito Miguel,

Maayong adlaw sa suking readers sa Banat News. Ako diay si Mark Jayco, taga Liloan, Cebu. Mangayo unta ko ug tambag bahin sa akong girlfriend nga si Laura nga grabe ka harsh manulti ug magsige og pamalikas, bisan gamay ra kaayo ang problema.

Sa higayon nga mag-away mi o naa siyay dili ganahan, kusog kaayo siya mosulti og bad words bisan daghang tawo makadungog.

Usahay maulaw gyud ko labi na kung naa akong pamilya o barkada. Tungod sa pagsige niya og pamalikas, nakaingon ang akong mga kaila nga wala’y ayo akong uyab ug dili angayan dalhon sa mga espesyal nga okasyon kay ako ra daw ang maulawan.

Gisultihan na nako siya nga maka-turn off gyud ang pagsige niya og pamalikas, apan wala gihapon siya nausab.

Love man nako siya, pero kapoy na kaayo pirmi ko maulawan ug ma-stress. Nagsugod na pud kog pangutana kung sakto pa ba ning among relasyon.

Unsa may angay nakong buhaton? — Mark Jayco

* * *

Mark Jayco,

Gihigugma gihapon nimo siya maski bastos siya manulti? Kun mao, tiunay imong gugma kaniya. Timan-i, lisod usbon ang batasan ug naandan. Mao na’y pagkatawo niya mismo. Natural ra niya nga hait siya manulti ug mamalikas. Wala’y angay usbon kay wala siya’g nakita nga sayop niini.

Pili, dawaton ug agwantahon iyang pagkatawo o imong usbon. Kun dawaton nimo ka’y lagi nahigugma ka, pag-andam nga ikaw mauwawan o magsige’g sagang para kaniya. Kun kaya na nimo buhaton, padayon.

Kun imo tul-iron, videohi siya sa tago kun magpabuhagay na sa iyang hait apan hiwi nga dila. Ini’g kalma, ipakita ang video, basin makaamgo. Ang tawo dili makakita sa kaugalingon maski manamin pa siya. Lagmit masuko ngano imo gi-videohan. Pasabta nga mao na’y paagi nga makita niya ang dugay na nimo nga pahimangno. Kun dili mag-usab, paniid. Buhaton ba niya sa ubang tawo, labi na sa labaw o ma’s kuwartahan pa niya. Kun dili siya mamalikas, kaya diay niya pugngan iyang baba. Pero ikaw, iya ra sayon sayonon. Kun magbantay siya sa iyang mga pulong atubangan sa laing tawo, ngano’ng dili man kanimo nga mao’y labing angayan niya respetohon.

Ang iyang batasan mohikaw sa imomg kalinaw, mahadlok ka basin motukar ug mauwawan ka. Suwayi’g dili ka magpakita niya. Kun mingawon ka, ayaw dayon pakigkita’g balik. Basin nabag-ohan lang ka. Paniid sa imong kaugalingon aron matubag imng pangutana kun sakto pa ba inyong relasyon. Kun mora ka’g nakalinglawas, angay na ka mohaw-as. — Tito Miguel

Magpatambag ka? Ipada kang Tito Miguel: 0991-318-9366