Uyab nga materialistic

Dear Tito Miguel ,

Ako diay si Philip, 24 anyos , taga Barangay Guadalupe ,  Cebu City . Naa koy uyab nga akong gihigugma pag-ayo ug siya si Shantelle Lyn . Ingon siya , grabe daw ang iyang love dinhi kanako , apan  naa gyud koy dakong problema nga lisod nako dawaton, murag sobra na siya ka-materialistic. Kanunay siya mangayo og mahalon nga mga butang sama sa  branded nga sapatos, bag, ug gadgets. Kung dili nako mapalit, masuko siya o maglagot.

Yes , maka -afford ra ko  kay naa ko tarong nga trabaho pero dili ko ganahan  nga manganad si Shantelle Lyn.  Seguro sala nako kay gi-spoiled nako siya  apan  nakabantay ko  nga nag-abusar naman siya uy.

Nakahuna-huna ko kung sakto pa ba ni nga relasyon. Gusto nako siya, pero kapoy na kaayo ko sa sitwasyon. Unsa man imong  ikatambag? Dapat ba nako siyang istoryahan pag-ayo, o kinahanglan na ba nako hunahunaon nga biyaan nalang siya kung dili siya mausab? — Philip

* * *

Philip,

Nagbaga nga puwa nga bandila kun iyang sukod sa imong gugma ka’y kun makahatag ka sa iyang gusto. Delikado, ka’y basin kun maminyo na mo, unahon pa niya ang shopping kaysa inyon pagkaon ug ubang batakan nga panginahanglan. Okay ra unta kun iyang kuwarta, pero imoha, angay gani unta siya maikog maski uyab mo. Ang tarong nga babaye dili mangayo, magpaabot ra’g regalohan. Aron ka makasiguro unsa’y importante niya, kani ang buhata. Agniha nga inay magpapalit siya’g mga materyal nga bagay, unsa kaha’g inyong tigomon ang kuwarta alang sa inyong kaugmaon. Dinhi nimo masukod kun seryoso ba siya nga inyong relasyon moabot sa kaminyoon.

Paniid sa reaksyon, kun mosugot nga madasigon, inyong relasyon duna pa’y kaugmaon. Kun mobalibad labi na’g mo-ingon sa sunod na ang pagtigom, iyang prayoridad ang karon, dili ang inyong kaugmaon. Kun dili motingog, tabla ra nga nibalibad. Kun mangluod, samot ka angay maalarma, buot pasabot wala siya’y buot. Kun tarong pa siya, iyang hinangpon imong suhestiyon. Sa relasyon kasagaran ang babaye mao’y maniguro nga magdayon mo ug mangandam para sa umaabot ninyo nga pamilya. Kun dili siya ing ana, angay na ka nga magduha duha. Ka’y kun magminyo mo, inay nga siya imong kapikas, siya mismo kanimo mopikas pikas.  —Tito Miguel

Magpatambag ka? Ipada kang Tito Miguel: 0991-318-9366