Wala mahigugma sa uyab

Dear Tito Miguel,

Maayong adlaw, idol gyud ta ka kun maghisgot na og tinambagay.

Ako diay si Niño, taga Barangay Mabolo, Cebu City. Nakaamgo ko nga mas love pa nako ang akong kanhi uyab nga si Zarine. Panakip butas ra gyud nako ang akong uyab karon nga si Charice.

Kahibalo ko nga wala na'y chance nga magbalik mi sa akong ex sanglit susama naman mi nga dunay tagsa tagsa ka mga uyab. Samotan na nga guwapo kaayo ang nauyab karon sa akong ex.

Ang akong problema na lang karon, unsaon mani nako, ganahan ko ma-develop sa akong present nga uyab nga si Charice. Dili sad ko ganahan mobiya niya kay makosensya gyud ko. Ang ako nalang karon, ganahan ko nga anam-anam ko nga ma-develop niya. Nahinaykan naman gud, maong panindigan nalang nako ang among relasyon bisan wala ko'y feelings kaniya. — Niño

* * *

Niño,

Ayaw pugsa imong kaugalingon. Gani, ang tinuod nga gugma kalit ra nimo bation, dili na kinahanglan sabton ngano. Tinuod, daghan na develop pero wala kini nila tuyoa ug damha. Gani, wala sila kamatikod nga nahulog na diay sila.

Hinuon, dunay moingon ang gugma desisyon, dili kun unsa’y imong gibati. Tingali sa uban puwede. Lagmit ila buot pasabot nahigugma sila sa primero, apan nahilis sa ngadto ngadto, ilang gibarugan labi na’g sila kasado. Kay uyab pa man mo, mahimo pa ka mobiya samtang wala pa mo mahinayak sa usa’g usa.

Dili makiangayon sa imong uyab karon nga imo lang siya giagwanta aron dili ka makunsensiya. Mao na’y ebidensiya nga wala kay gugma niya, respeto ug kaluoy na lang ang nahabilin. Pero’g makakaplag ka’g lain, lagmit mobiya na ka sa hingpit o dili ba kaha linglahon nimo siya. Dili na niya deserve, gawas kun daginoton ka niya.

Mas maayo mosulti ka niya sa tinuod nimo nga gibati, unya siya ang pahukma. Kun makigbuwag siya nimo, sulbad na imong problema. Kun ganahan siya magpadayon mo, ingna nga wala ka’y ikapasalig. Posible mosugot gihapon na, kun dili siya makaako mobiya kanimo. Sa pagka karon. Makaamgo ra gihapon siya pag abot sa panahon.

Sa maong paagi dili ka makonsensiya. Una, nikumpisal ka sa tinuod. Ikaduha, siya ang nidesisyon kun magpadayon ba mo o dili na. Ikatulo, dili na nimo mistil pugson imong kaugalingon unsaon siya’g tratar, kahibawo na man siya asa ra ka taman. — Tito Miguel

Magpatambag ka? Ipada kang Tito Miguel: 0991-318-9366