Gikapoy na sa uyab

Dear Tito Miguel,

Maayong adlaw, ako diay si Danaya, taga Alegria, Cebu. Naa koy uyab nga halos usa na ka tuig na. Sa sugod, okay ra kaayo mi. Malipayun, magkasinabot, ug naa gyud siya’y time alang kanako. Ang iyang pangalan diay kay Matthew.

Pero karon, usahay mura na kog way uyab. Sige na lang siya og laag. Halos kada gabii, naa gyud siya sa disco bar, uban sa iyang mga barkada. Niana siya nga “pawala sa stress,” pero para nako sobra na kaayo. Usahay dili na gani siya mo-reply kay mas gipalabi niya ang iyang laag. Malingaw gyud siya og disco, dili ko niya paubanon aron dili ko mahasol. Dili man ko gusto nga pugngan siya sa iyang kalipay, pero unsaon man nako pagkumpyansa kung naa siya sa lugar nga daghang babaye? Giingnan na nako siya nga dili ko komportable ana, pero ingon siya nga ako lang kuno ang selosa ug dili kasabot sa iyang hilig. Gikapoy na gyud ko sa akong uyab, dapat ba nako ni dawaton kay mao man gyud siguro ni siya sukad pa? O kinahanglan ba nga makigbuwag nako kay murag dili na ko prayoridad niya?

Salamat daan sa imong tambag. — Danaya

* * *

Danaya,

Sa iyang lihok ug buhat masukod kuna asa ka dapit sa iyang kasingkasing. Klaro kaayo, dili ikaw ang prayoridad. Apan ang mas klaro, dili pa siya andam mosulod o magpabilin sa seryoso nga relasyon. Busa pasagdi, aron imo mapanid-an unsa iya buhaton kun dili na ka mamadlong. Kun daw usa siya ka langgam nga nakalupad gikan sa hawla kun wala siya sa imong kiliran, buot pasabot nag-agwanta ra siya’g nagmantinir kanimo. Dili ikaw ang iyang kalipay ug lingaw, apan tua sa lain, lagmit barkada o lain babaye ba kaha.

Kun siya mahibulong, mangutana ngano dili na nimo siya pugngan, diha na ka mo-istorya ngano. Ingna nga imo na gihatag kaniya ang kagawasan mobuhat sa unsa iya gusto buhaton. Kun gusto siya’g lingaw kada gabii, bahala siya. Kun gusto siya mamabaye, bahala siya. Buot pasabot nakigbuwag na ka. Paniid, unsa’y reaksyon, kun dili mosugot magbuwag mo, diha na isulti imong gusto, nga angay niya limitahan iyang mga laag. Kun mopasalig nga mag-usab, hatagi’g higayon. Apan ayaw salig sa pulong, sukda gihapon sa iyang lihok.

Kun mosugot magbuwag mo, natubag na imong pangutana kun angay ba ka makigbuwag niya. Pero lagmit mohilom ra na, molakaw nga wala’y gipamulong. Pasagdi, kun mobalik nimo nga mag-usab, hatagig’ second chance. Kun mobalik nga wa’y kausaban, buwagi na. Kun dili mobalik, imong pangutana natubag na sa hingpit, maski wala siya nanamilit. — Tito Migue

Magpatambag ka? Ipada kang Tito Miguel: 0991-318-9366