Dear Tito Miguel ,
Ako diay si Jan Mark, taga Tagbilaran City ,Bohol. Kusog kaayo ang Banat News dinhi sa Bohol . Duna ko'y girlfriend ,siya si Arian , taga Cebu City . Laktod pagkaistorya, long distance relationship o LDR ang among status . Maglagot ko,kay ako permi ang mag-initiate o mag-effort nga magkita mi. If dili ko mosulti ,dili rapud siya makigkita nako . Kahibalo man ko nga puros mi busy ,grabe rapud kaayo siya ,murag walay gana makigkita nako.Tarong pa ba ni akong uyab ? Ako nalang kaha ni buwagan? — Jan Mark
* * *
Jan Mark,
Duna siya’y gustong isulti kanimo apan dili pa niya kaya ipamulong, nagpaabot ra siya nga ikaw ang makasabot. Lagmit iyang gugma kaniadto nihupas na. Sakto imong napanid-an, wala na siya’y gana makigkita kanimo. Kay kun interesado ug madasigon pa unta siya makigkita kanimo, dili sa tanang higayon ikaw mo-initiate. Nag-agad ra siya nimo pirmi, kun makigkita ka na-obligar lang siya. Apan kun dili, basin mas malipayon siya.
Layo gud mo sa usa’g usa, unta maghinam hinam siya makigkita nimo maski kadiyot ra. Iyang pahimuslan ang higayon nga magkita mo. Apan wala siya’y gibuhat.
Aron masusi asa na ka dapit sa iyang kinabuhi, undangi’g pakigkita niya , ayaw’g text o tawag. Kun dili ka pangitaon, buot pasabot dugay na siya nagpaabot nga ikaw ang makasabot. Ayaw pangutan-a, sabta na lang. Kay kun tiunay ka niya nga gihigugma, angay siya ma-alarma kun naunsa ka. Kun pangitaon ka, paminaw’g maayo unsa iyang isulti. Kay posible natingala lang ngano kalit nawala ka. Igo ra siya gusto makahibawo nga luwas ka, pero ang pakigkita kanimo wala na sa iyang kalendaryo.
Labi na’g dili gihapon maghisgot kun kanus-a mo magkita. Buot pasabot kanimo wala siya mingawa. Ayaw gihapo’g hisgot nga magkita mong duha, paabota nga siya ang mouna. Kun dili gihapon, buot pasabot wala na mo’y karon, gibilin na niya sa kagahapon.Dili rason ang trabaho. Tinuod dunay higayon nga busy kaayo apan dili sa tanang panahon. Matud pa, pag gusto maraming paraan, pag ayaw maraming dahilan. Tito Miguel
Magpatambag ka? Ipada kang Tito Miguel: 0991-318-9366