Daan na ang Meter

CEBU, Philippines — Nagpasalamat si Ryza Cenon nga nasulbad na ang iyang problema sa bayranan sa tubig. Nakugang ang aktres human nga nikabat og P120K ang iyang bayranan sulod lamang sa usa ka buwan. Niadto matud pa ang Maynilad sa ilang panimalay ug giilisan ang ilang water meter. Nasuta sab nga adunay leak sa ilang linya. Apan bisan og adunay leak imposibli sab nga niabot og P120K ang bill. Niingon ang Maynilad nga daan na gyud ang ilang metro ug kay dili na masuta pila gyud ang husto, gipabayad sila og kantidad nga kasagaran nilang nabayran sa nilabay nga unom ka bulan. Hinungdan nga P2K na lamang ang ilang bill.

Sila pa ba?

Wala pa gyud sukad ma-guest ni Gladys Reyes sa iyang talk show sa Net 25, si Heart Evangelista, sa 16 years na niini sa ere. Suma ni Gladys, kun makahigayon man gani og lugwa si Heart sa Moments, mangutana siya niini kabahin sa gustong mahibaw-an sa publiko kun sila pa ba ni Senator Chiz Escudero. Suma ni Gladys, dili siya marites, iya lang ibutang sa dapit sa viewers ang iyang kaugalingon. Kanunay niyang hunahunaon, unsay buot masayran sa nagtan-aw sa iyang show matag Domingo, 4p.m.

Sweet messages

Hingpit na nga gituldukan nila ni Jericho Rosales ug Kim Jones ang intriga nga nagbuwag na sila. Nagbinayloay og i love you message ang duruha sa Instagram niadtong Huwebes, human gi-greet ni Kim ang iyang bana nga nagbirthday niadtong adlawa.

Patch, kaslonon

Engaged na si kanhi Bb. Pilipinas International Patch Magtanong ngadto kang Josh Cordovez. Sa gawas sa nasud nahitabo ang ilang engagement basi sab sa mga hulagway nga gi-upload ni Josh. Igsuon si Josh sa kanhi beauty-queen pud nga si Nicole Cordovez.

Freelancer

Nagbakasyon pa siya. Kana maoy tubag ni Ruffa Gutierrez ngadto sa usa niya ka follower nga niingon nga naguol siya kay gibiyaan na sa aktres ang It's Showtime aron mobalhin sa AllTV. Apan matud ni Ruffa:"Hindi ko iniwan ang It's Showtime. I'm on vacation po." May laing follower sab ang niingon nga mingawon siya kang Ruffa kay nadunggan niya nga nibalhin na kini sa AllTV. Niingon ang actress/host, freelancer siya ug wala siya'y kontrata sa bisan unsa nga network,busa mahimo siyang motrabaho bisan asa. Nasayran nga nagsugod ang mga tsika human nilugwa si Ruffa sa soft launching sa AllTV adtong September 13. Viva Artist Agency ang nagdumala sa career ni Ruffa.

Amila Sabine Homan

Nanganak na diay niadto pang September 20, si Angelica Panganiban. Amila Sabine Homan ang kompleto nga ngalan sa ilang anak sa negosyanteng si Gregg. Kagahapon pa gi-upload ni Angelica ang dagway ni Sabine, diin nakadawat dayon kini og 98K reactions sulod lamang sa usa ka oras.

Nakaamgo

Giangkon ni Jameson Blake sa interview ni Ogie Diaz nga nakasuway na siya nga magdrugs sa pagsulod na niya sa showbiz. Party drugs matud pa iyang nagamit. Apan giklaro niya ngadto kang Ogie nga gitalikdan na niya ang maong bisyo niadtong pandemic. Nipauli matud pa siya sa Pampanga, ug didto siya nakaamgo nga aduna pay mga mas importanteng butang nga angayan niyang himuon inay magbisyo. Kinahanglan sab niyang magtarong sanglit siya ang breadwinner sa pamilya. Produkto si Jameson sa PBB niadtong 2015. Kasamtangan siyang lakip sa cast sa ABS-CBN series, A Family Affair.

"Natitiyaga nila ako"

Subling gisaad ni Gigi de Lana  nga dili gyud niya biyaan ang Gigi Vibes, ang banda nga maoy kauban niya hinungdan nga naila siya online atol sa pandemya. Suma pa niya ngadto sa Magandang Buhay, dili gyud siya mutugot nga magbuwag sila sa iyang bandmates."Kahit minsan nakikipag-away ako sa kanila kasi may moments na hindi ko na kaya, ang daming pressure. Tapos minsan may tao kang napagbubuntunan ng galit, na hindi mo naman dapat sa kanya maano, pero natitiyaga nila ako."

Maris @25!

Nagbaha ang mga hulagway ni Maris Racal sa iyang IG account sukad niadtong Huwebes hangtud kagahapon. Kuha kini sa birthday photo shoot niya kauban ang fashion photographer nga si BJ Pascual. Gisaulog ni Maris ang iyang 25th birthday niadtong Miyerkules kauban iyang pamilya, mga higala, ug syempre, palalab nga si Rico Blanco.