Mibalik si Maria!

Lakip ang Sugbuanon nga si Maria Gigante ug ang anak sa usa ka kanhi beauty queen sa 35 ka mga kandidata alang sa Miss World Philippines karong tuiga.

Si Ashley Subijano Montenegro, nga anak ni 1994 Miss World Top 10 finisher Cara Subijano ug sa model ug TV host nga si Hans Montenegro mosunod sa lakang sa iyang inahan sa pamasin nga madughit niini ang korona nga wala maangkon sa iyang mama.

Samtang sa ambush interview sa HEYADAMG Youtube channel kang Maria sa pagpa screening pa lang niya, nagkanayon ang karon 28 anyos na nga Bb. Cebu winner nga gumikan sa pandemic, nakaamgo siya nga ganahan gyud siya niining maong pageant hinungdan nga nibalik siya human sa unom ka mga tuig.

Katapusan siyang nanimpad sa national pageant niadtong 22 anyos pa lamang siya diin nalakip siya sa mga kandidata sa Bb. Pilipinas. Pagka sunod tuig, nisalmot siya sa labing unang Bb. Cebu diin nakoronahan siya isip Bb. Cebu Charity.

Kadto ang katapusan niyang pageant sanglit nihukom siya nga humanon una ang iyang pagtuon. Gradwado na si Maria og kursong Philosophy.

Kun palaron, buot niya nga ang Miss World crown gyud ang iyang madaog ilabi na nga haom kaayo kini sa iyang adbokasiya may kalabutan sa pagmugna og livelihood projects nga iyang gisugdan pagdaog niya sa Bb. Cebu, katambayayong sab ang Gawad Kalinga.

Daghan nga pageant fanatics ang naglaom gyud nga mobalik pa si Maria sa pagsalmot og national pageant gumikan kumbinsido sila nga haom kini makigtigi sa dagkong mga international pageants.

Gawas kang Subijano ug Gigante, ang mga kandidata karong tuiga mao sila si Angel Jed Z. Catorre, Maica Martinez, Marie Louise, Shaina Rose M. Ico, Maria Nina Soriano, Lady Justerinnie Santos, Kim Tiquestiques, Beatriz Mclelland, Simone Nadine Bornilla, Ivanna Kamil S. Pacis, Erika T. Vinculado, Kevyn, Alessandrea Mateo,  Cassandra Chan, Loraine Joy Arpia, Anje Mae Manipol,Paula Madarieta Ortega, Justine Felizarte, Ingrid Santamaria, Kayla Ariadne Tiongson, Samantha Gabronino, Alana Joaquin, Angela Teng, Gwendolyne Fourniol, Patricia Mcgee, Patricia Dizon, Carla Manuel, Kristal Marie Gante, Natazha Vea Bautista, Erika Kristensen, Alison Black, Charyzah Esparrago, Marinel Tungol, ug Blessie Villablanca.

Walo ka mga titulo ang madaog gikan sa maong pageant nga naglakip sa Supranational,Reina Hispanoamericana, Eco Teen International,Multinational, Eco International, Environment International, Tourism, ug World.

Duha ka mga sugbuanon ang nidaog sa nilabay nga tuig. Sila mao si Shaila Rebortera isip Miss Multinational ug si Tracy Maureen Perez isip Miss World Philippines. Wala pa mahitabo ang international competition alang ni Shaila, samtang Top13 si Maureen sa Miss World niadtong Marso.

Si Maria, sama kang Maureen nga ubos sa pagdumala sa Origin Management dinhi sa Sugbo, ug nagtraining sa Aces&Queens sa Manila. Sa maong modeling agency ug training camp sab naggikan si Miss Universe Top 5 Beatrice Luigi Gomez.

Ang Miss World Philippines pageant mahitabo sa MOA Arena karong June 5.