Ayaw pugsa
Dear Tito Miguel,
Ako diay si Ange. Ang akong problema is ang akong pamilya dili ganahan sa akong bana. Ang makita nila pirme is bad side pero buotan man akong bana, Tito. Napiit ko nila kay pirme mi e- lookdown og maayo. —Ange
Ange,
Ang tawo lain-lai’g ipakita depende sa kaatubang. Gawas niana, dili pareha’g panan-aw ang ubang tawo maski usa ra imong lihok. Gani ikaw lagmit sa imong mga higala saba ka, pero kalit matak-om atubangan sa imong amo sa trabaho, kun duna man, o dili ba kaha pulis ug militar o labaw sa inyong tinuohan.
Lagmit mao ni imong bana, buotan sa imoha apan distansya sa imong pamilya kay ma-uwaw o mahadlok unsa ilang ikasulti. Unsa man sad kaha nga bad side ilang pasabot, iresponsable o arogante? Angay ka mangutana nila’g unsa gyud ilang problema sa imong bana. Kun tungod kay siya iresponsable o arogante, duna sab sila’y katarungan moreklamo. Angay sab nimo agnihon imong bana nga magbag-o. Apan kun di lang gyud sila ganahan sa imong bana, maski unsa iyang buhaton dili gihapon sila makauyon. Dunay mga tawo nga maski wa ka unsaa, maglagot lang gyud ka. Basin mao na imong bana sa ilaha.
Tingali sab tungod kay nagpakita sila’g disgusto sa imong bana, samot siya nipalayo, nga para nila pagminaot. Pero kay para nimo buotan man imong bana, ipasalig kanila nga ikaw natagbaw ug malinawon, nga kanila unta makapahilom. Ayaw sila pugsa pagtuo nga imong bana maayong tawo. Pasagdi nga sila mismo makatestigo unsa siya kamaayo. Kun di gyud sila magkasinabot, sagdi lang basta kamo sa usa’g-usa malipayon. Ikaw iyang gipakaslan, dili imong pamilya. Mas maayo unta tanan magkasinabot. Pero kun lisod kini makab-ot, ayaw pugsa kay samot magkagubot. —Tito Miguel
Magpatambag ka? Ipada kang Tito Miguel: 0998-581-5856
- Latest