Banat Writer, Winner!

CEBU, Philippines — Dili lalim masunogan ug iyaha gyud kini naagian mismo. Mao kini ang gibutyag ni Andro Banate kinsa maoy nagsuwat sa awit nga “Hindi Ka Nag-iisa, Sunog Iwasan” nga nahimong grand winner sa Himig Handog Laban sa Sunog, Singing and Songwriting Contest nga gipasiugdahan sa Bureau of Fire Protection (BFP)-Cebu City.

Matud pa ni Banate nga siya mismo mabinantayon na gyud sanglit nasunog ang iyang balay niadtong 2016 nga bag-o pa lang gyud natukod niadtong higayona.

Usa kini sa mga panghitabo sa iyang kinabuhi nga dili gyud niya malimtan apan wala gyud siya ni-surrender sa maong pagsulay.

“Fire prevention. Likay ug paghupot og kaalam nga malikayan ang sunog. Kinahanglan tang maghiusa aron makab-ot ang gitinguha nga kaalam aron malikayan ang sunog,” suma pa ni Banate sa dihang gipangutana kun unsa ang nag-unang mensahe sa iyang awit.

Ang interpreters sa “Hindi Ka Nag-iisa, Sunog Iwasan”  mao sila si Jake Batiancela ug Necie Diaz kun diin girepresentar nila ang Barangay Guadalupe.

“Tungod sa akong kaagi, kay 10 minutes lang nako gisuwat ang lyrics, two hours sa paghimo sa melodiya. Unya wala molapas og usa ka semana ang pag-produce including recording ug video shoot for music video,” nagkanayon si Banate.

Dugang pa niya nga nasurpresa gyud siya og maayo sa dihang gianunsyo nga siya ang mananaog sanglit puros man gyud nindot ang tanang nisalmot sa kompetisyon.

Kahinumdoman nga ubay-ubay na ka songwriting contests ang nasalmotan ni Banate ug nakalangkat gyud siya og mga puwesto.

Kini sama sa Salamat Na Lang sa Cebu Pop Music Festival 2015 (champion), Kristo Kaloy-i Kami sa BibLi-Awit Songwriting Contest 2016 with Cerj Michael (2nd place) ug Angkla Songwriting Contest 2018 (3rd place) ug uban pa.

Ubay -ubay na usab ang na-submit niya nga entries sa Original Marian Song Festival sukad niadtong 2014.

Nahimo usab siya nga writer sa Sugat sa Guadalupe pila ka tuig na ang nilabay.

Siya pud ang manunulat sa pipila ka radio drama sa istasyon nga dySS-999khz.

Estilo ni Banate sa pagsuwat og kanta mao  ang paggamit sa elemento nga dunay bug-at nga kahulogan kun diin duot kini sa kasing-kasing sa tawo nga maminaw niini.

Mogana usab ang iyang pagsuwat sa lawom nga kagabhion kun diin ma-feel niya ang kabugnaw ug kamingaw sa ilang dapit sanglit naa man siya sa bukirang bahin nagpuyo.

Alang kaniya, basta kinasing-kasing lang gyud, mahimong tulin ang pagsuwat og kanta ug makabaton kini og kusog mga impact ngadto sa mga tawo nga maminaw niini.

Si Banate kun Dro Arts mao nagtagik sa mga mubulokon nga sugilanon dinhi sa Banat News sama sa “Mga Eba Sa Paraiso Ni Adan”, “Ako Si Jonah”, “Gugmang Makamaoy”, “Gugma ug Kasilag”, “Isla Gugma”, “Gugmang Makamaoy” ug ang bag-o lang nagsugod nga “Gugmang Makabuang.”

Derek: I see love, I embrace love

Engaged na sila si Ellen Adarna,32,ug Derek Ramsay,44, niadtong Martes sa gabii, mga duha ka bulan sukad sila nagka relasyon.

“Game over” ang caption ni Ellen sa mga hulagway nga iyang gi-upload nga kuha atol sa engagement ceremony diin tataw nga nakugang ang Cebuana. May punto pa nga nihilak siya.

May hulagway sab siya nga gi-upload diin kauban nila ni Derek ang ilang mga anak nga si Elias Modesto ug Austin. Si Elias, anak ni Ellen ug sa ex-boyfriend niya nga si John Lloyd Cruz samtang si Austin, anak ni Derek sa ex-wife niya nga si Mary Christine Jolly.

Samtang kagahapon sa usa ka Instagram post, tataw nga nag-awas pa gyud ang gugma ug pagka kilig nga gibati ni Derek human siya nag-propose niadtong Martes.

Nagpasalamat siya kang Ellen nga nag-yes kini, ug dungog matud pa niya nga nisugot ang nahisgutan.

Suma pa ni Derek, sa sinugdanan pa lang, dili gyud malimod ang “chemistry” nilang duha nga usahay mag-apas pa siya sa iyang gininhawa tungod sa iyang pagbati. Niingon sab siya nga kaniadto, giisip niya nga ang gugma “intangible”, o dili mahikap ni makita, apan karon nausab na iyang panlantaw.

“When I look at you I see love and when I touch you I embrace love.” Ni Derek pa.

Rachelle, mama na!

Gihimugso na ni Broadway ug West End star Rachelle Ann Go ang unang anak nila sa iyang bana nga si Martin Spies. Lalaki ang bata ug ginganlan nila og Lukas Judah Spies. Suma pa ni Rachelle, ang Lukas nagkahulogan og, “bringer of light”, samtang “praised, let Him be praised” ang pasabot sa Judah.

Buwag na?

Mora’g adunay problema karon ang kaminyuon nila ni Jennica Garcia ug Alwyn Uytingco human nabantayan nga gipapas sa nahauna ang mga hulagway nila sa nauwahi gikan sa iyang Instagram account. Sa interview ni Cristy Fermin, gipangutana si Jennica kabahin niini, apan nagdumili una siya pagtubag sanglit dili pa siya andam nga hisgotan kini. Apan iyang nabutyag nga nag-abang siya karon og one bedroom unit kauban ang duha niya ka mga anak. Si Jennica, anak ni Jean Garcia ug kanhi aktibo sa mga salida sa GMA7.

Ayaw lang  gyug ka ospital

Kalmado nga gitubag ni Kakai Bautista ang iyang basher nga nikomentaryo nga hayan magsuka si Mario Maurer kun makakita sa swimsuit photo nga gi-upload sa aktres niining bag-o lang. Matud ni Kakai, okay ra niya kun mao ni makapalipay sa basher apan gipasidan-an niya nga magmatngon kay basin og maospital kini gumikan sa kalagot.