Mobalik sa GMA7?

Pangutana karon kun senyales ba ang paglugwa ni Aljur Abrenica sa Bawal Judgemental segment sa Eat Bulaga niadtong Lunes sa iyang pagbalik na sa GMA7, tulo ka tuig sukad siya nilayat paingon sa ABS-CBN. Gikapungtan sa pipila ka Kapamilya stars ug fans si Aljur sanglit medyo dili maayo ang iyang reaksyon human nga gibasura ang franchise renewal application sa ABS-CBN.

Dili pa sa 2021

Dili pa sa 2021 magpakasal si Glaiza de Castro ngadto sa iyang pamanhunon nga si David Rainey. Suma pa ni Glaiza ngadto sa 24 Oras, aduna pa silay mga trabaho, gani sa pagbalik niya dinhi sa Pilipinas gikan sa Ireland diin nahitabo ang proposal, mopahuway lamang siya og pipila ka mga adlaw sa dili pa sugdan ang iyang bag-ong project.

Sa Subic na mamuyo

Plano sa magtiayong Megan Young ug Mikael Daez nga sa Subic na manimuyo sugod karong 2021. Taga Subic si Megan, ug aron masuta kun andam na ba gyud sila nga didto na magbase, mangabang una sila og balay didto hangtud nga mahimong pinal na ang ilang hukom nga adto na magtukod og kaugalingong balay.

Lahi nga pamaagi

Wala tugoti ni direk Antonette Jadaone nga mag-istorya sila si Paulo Avelino ug Charlie Dizon sa unang bahin sa ilang shooting alang sa award-winning movie Fan Girl. Kini aron gyud ma feel ni Charlie ang iyang character nga si Jane, kinsa usa ka fan girl. Buot ni Jadaone nga natural ra gyud ang acting sa duha niya ka mga artista hinungdan nga may mga lakang siya nga medyo lahi kay sa naandan nga mga shooting sa us aka pelikula. Ug kining tanan nagbunga sanglit best actor ug best actress sa Metro Manila Film Festival sila si Paulo ug Charlie; best director si Jadaone ug best picture ang ilang pelikula.

Move on na tayo

Kalmado nga gitubag ni Mau Taylor ang usa ka netizen nga nangayo og latest bold picture niya pinaagi sa Instagram. Tubag ni Maui: hindi na uso yun, Move on na tayo. Apan may mga netizens nga napungot sa maong hangyo kay para nila binastos kaayo ug nagpaila lamang unsa ka manyak ang maong netizen. Si Mau kanhi sexy star ug usa sa labing sikat nga membro sa all-female group kaniadto nga mao ang Viva Hot Babes.