Kris, gilabanan si Angel

CEBU, Philippines — Gipikhan ni Kris Aquino ang DepEd human gibastos sa usa ka magtutudlo si Angel Locsin pinaagi sa paghingan niining “obese” ug nagpunay lamang matud pa og kaon ug walay exercise. Kana maoy nasulat sa module nga mugna sa magtutudlo.

Matud ni Kris, nakasabot siya sa sitwasyon karon sa mga magtutudlo, apan dili matud pa kini rason nga magbinastos sila ilabi na nga gikan sa katawhan ang ilang sweldo.

 “I understand mahirap ang trabaho ng mga guro at kadalasan hindi sapat ang sweldo … pero ang budget ng DepEd ay galing sa mga Pilipino, mga nagtatrabaho at nagbabayad ng buwis ang nagbibigay pondo para sa DepEd. In other words, lahat tayo stakeholders dito kaya mali kung ang likas na matulungin sa kapwa ang 'paglalaruan' in the guise of 'pagtuturo,' nagkanayon si Kris.

Dugang pa niya nga tinuod nga adunay kagawasan ang tanan, apan kinahanglan matud pa nga magmatngon ilabi na nga ang gitudluan mga paglaom sa nasud.

“Yes, we live in a democracy and the teacher has the right to exercise the same rights all of us have, the right to free speech. But in this instance, the person in authority (the teacher) is playing a significant role in shaping the values and characters of his/her students,” dugang pa niya.

Kahinumduman nga nanawagan ang dakong opisyal sa DepEd Mindoro nga ihunong na ang pagpangatake sa maong magtutudlo. Dinhi wala makauyon si Kris.

Niya pa, “Sir / Ma’am, kung mamemersonal po, open naman ang comments ni Angel sa Instagram and Twitter niya. Kahit hindi po kagandahan ang opinion sa kanya, at least sa mas na angkop na 'forum' in-express.”

Una niini, namahayag si Angel nga okay ra niya ang maong insult, apan dili okay nga daw okay ra sa kadagkuan sa DepEd ang gibuhat sa magtutudlo. Nabalaka siya sa matang sa makat-onan sa mga estudyante kun ingon niana nga walay maayong pamatasan ang magtutudlo.

Sa kataposan, nagbilin og mensahe si Kris para kang Angel nga nagkanayon, “Kagaya nga ng paulit-ulit kong sinasabi sa’yo, hanga ako sa tatag at tapang mo. Isang sobrang higpit na yakap sa Ate mong nagmamahal.”

Reunion sitcom

Kun wala matud pay kausaban sa plano, sugdan sunod bulan ang taping nila ni John Lloyd Cruz ug Bea Alonzo alang sa usa ka family sitcom nga gam-on sa Brightlight Productions ug isalida sa TV5. Sunod bulan sab matud pa sugdan ang shooting sa comeback movie ni Loydie nga gam-on gihapon sa Brightlight Productions. Tulo ka mga tuig nga nipalayo sa showbiz si John Lloyd ug nagbase dinhi sa Sugbo sukad nagkarelasyon sila ni Ellen Adarna. Bulag na ang duruha, apan managhigala sila tungod ug alang sa ilang anak.

Naa na sa TV5

Sa TV5 ug dili sa ABS-CBN makita si Kris Bernal sugod karong November 23. Si Kris maoy bida sa weekly series Ate ng Ate kauban sila si Isabelle de Leon, Joem Bascon ug Jake Cuenca. May guest appearance sab siya sa Sunday Noontime Live.  Ang umaabot nga teleserye ni Kris iyaha sa Brightlight Productions. Freelance artist na siya karon human ni-expire ang iyang kontrata sa Kapuso Network pipila ka bulan na ang nilabay.

Motor riding ang gikalingawan

Motorcycle riding ang gikabusyhan karon sa TV host nga si Iya Villania gawas sa iyang trabaho para sa 24 Oras ug pag-atiman sa ilang mga anak ni Drew Arrellano. Nag-formal training gyud si Iya gamit ang usa sa mga motor nga gipanag-iya sa iyang bana. Apan wala pay tsika kun plano ba ni Iya nga mosalmot og riding competition sa umaabot.

Jona sa TV5

Si Jona ang nikanta sa official soundtrack (OST) TV5 Christmaserye Paano, Ang Pasko?, diin iyang gi-revive ang original song ni Gary V. nga Pasko Na Sinta. Mao ni ang labing unang project ni Jona nga dili iyaha sa ABS-CBN. Hinuon, naa pa gihapon siya sa ASAP Live matag Domingo ug I Can See Your Voice matag Sabado. Ang mga nahisgutan, puros regular shows sa ABS-CBN.

Nilaban kang Rabiya

Gidepensahan ni Michele Gumabao si Miss Universe Philippines Rabiya Mateo gikan sa mga pagsaway nga nadawat niini gikan sa netizens nganong naghomecoming ang nahisgutan didto sa Iloilo inay mangayo’g tabang alang sa mga nabiktima sa bagyong Ulysses. Matud sa second runner-up nga si Michele, dili ingon niana kadali ang pag-usab og schedule ug sigurado siya nga hagbay rang natakda ang maong homecoming ni Rabiya. Matud pa niya ngadto sa mga nikomento nga mas maayo pa siya ni Rabiya kay naglihok siya aron matabangan ang mga biktima, managsama sila nga adunay gihimo aron makatabang sa nanginahanglan.

Tak-om pa

Wala pa motingog sila si Derek Ramsay ug Andrea Torres kabahin sa tsika nga nagbuwag na sila. Apan ang mga nagsunod gyud sa mga panghitabo sa showbiz nakahunahuna nga usa sa dakong basehanan mao ang kalit nga pagkalakip ni Andrea sa umaabot nga teleserye ni Dennis Trillo nga mao ang Legal Wives. Ang original leading ladies gyud niini mao sila si Alice Dixon, Bianca Umali ug Megan Young. Apan nawagtang si Megan ug nasulod si Andrea, kansang gitakda gyud unta nga project mao ang Sanggang Dikit kauban ni Derek.

Free Aparment

Gipahimuan og apartment sa magtiayong Robin Padilla ug Mariel Rodriguez ang ilang mga katabang didto sa Museo Padilla nga nahimutang ra sa ilang compound. Butyag pa ni Mariel pinaagi sa iyang latest vlog nga nahukman kini sa iyang bana pagsugod  sa pandemya diin ilang gipatuman ang kamanduan nga wala na gyu’y makasulod gawas sa ilang balay alang usab sa kasiguraduhan sa tanan. Apan kay pamilyado man sab ang maong mga katabang, mingawon gyud sila  sa ilang tagsa-tagsa ka pamilya kun dili sila makaduaw. Hinungdan nga gipahimuan na lang gyud nila og apartment building ang lima nila ka mga katabang aron ikauban nila ang ilang mga pamilya.

Winner sa Korea

Gipasidunggan isip Best Web Series sa Seoul Indie Shorts Awards ang BL series nga Gameboys nga gibituon nila ni Kokoy de Santos ug Alijah Canlas. Ang  Gameboys, istorya sa duha ka mga gamers nga nagkarelasyon taliwala sa pandemya. Mikabat og milyon ang views sa matag episode niini hinungdan nga giisip kini nga labing malampuson nga BL series sa Pilipinas pagkakaron.

Lain-lain  og hosts

Siyam ka buok ang hosts sa umaabot nga Pinoy Big Brother Connect sa ABS-CBN. Kini maglangkob nila ni Toni Gonzaga, Bianca Gonzales, Robi Domingo, Enchong Dee Richard Juan, Mayward, Melai Cantiveros ug Kim Chiu. Ang tsika mao nga lain-lain og host kada platform. Buot pasabot lahi ang mo-host para sa Kumu, sa telebisyon, Youtube, Facebook ug uban pang platform diin ipasalida ang PBB.

Tabang sa  Cagayan

Nilupad paingon sa Cagayan ug Isabela sila si Ruffa Gutierrez ug KC Concepcion aron maghatud og hinabang. Sa usa ka video post, nagpasalamat si KC daan sa tanang mopalit sa iyang hinimo nga alahas diin  ang halin niini diretso nga gamiton alang sa dugang hinabang sa mga biktima sa bagyo. Samtang sa post sab ni Ruffa, gidala niya iyang mga anak nga sila si Venice ug Lorin sa maong biyahe. Suma pa niya, eroplano ni Gov. Chavit Singson ang ilang gisakyan.