Beauty queen online seller

CEBU, Philippines — Aron makasugakod ug maangkon ang  inadlaw-adlaw  nga panginahanglanon , nag-online seller ang beauty queen nga si Erika Faith Emnace Veloso  ug nihumot og samot sa netizens ang iyang pangalan.

Si Faith ang Miss Alegria Tourism 2018 ug siya ang  reigning Bibinibing Talibon . Matud pa ni Faith nga ang pagpamaligya og nagkdaiyang produkto maoy usa sa pamaagi sa  pag-survive karong panahona.

Pinaagi sa iyang social media account, iyang giplastada ang iyang mga baligya nga nagkadaiyang klase sa seafoods nga sama sa aninikad, lambay, isda, pasayan, scallops ug uban pa.

Malipayon siya sa suporta sa iyang mga kaila sa Minglanilla.

“Lisod ang panahon ron, nangita nalang kog gagmay na paagi aron maka earn pud ug maka tigom kay wala jud ta kabaw sa mga umaabot pa nga panahon, at least naa nay ta’y gamay nga tinigoman  aron naa puy gamay na makuot if magkalisod,” niya pa. Nagkanayon ang beauty queen nga dili pud lalim ang mag-online seller.

“Maglista pa, mangunay pag hapnig ug limpyo,  unya mo-deliver  pa jud ko , so physically draining gyud ,” suma pa niya.

Gipaagi niya kini og  pahiyom aron dili siya makahuna-huna nga  mo-give up. Duna pu’y mga higayon nga mayawyan siya og buyer apan nagmapaaubsanon lang gyud siya.

“Naay  mga magyawyaw pero siyempre gamitan lang jud og  customer service kay kita baya ang nag -need, ug respeto pud isip usa ka tao labi na ang customers nako sa online mga maguwang pa nako, kailangan gyud og  taas nga pasensya ug pagsabot. Taason gyud  dapat ang utong kay nisulod man gyud  ko aning kalakiha,” matud pa ni Faith.

Suma pa niya nga tungod sa pandemya, nasamad gyud ang  ekonomiya busa nakaapekto gyud kini sa katawhan ilabi na sa pinansyal nga aspeto.

Aminado si Faith nga  gumikan sa pandemya ,dili gyud masabtan ang gibati niya nga kahadlok ilabi na nga bag-o kini nga klase sa  suliran nga nasinati sa mga tawo.

Suma pa niya nga usa siya ka working-scholar busa kinahanglan gyud nga duna siya’y igong ikapuno sa ubang gastohanan sa higayon nga moabli na og balik ang klase.

“Ang kahimtang karon kay apektado gyud ang tanan, labi na financially, ako dili ko mahimotang nga naa ra sa balay matulog ug walay buhaton. Naa sad baya tay gusto ug kinahanglan nga paliton maong mangita nalang kog paagi para maka kwarta. Ako nalang gianam-anam og hipos ang ginagmay nga ginansya  ,” niya pa.

Ang 19 anyos nga si Faith nagkuha sa kursong Bachelor of Science in Civil Engineering sa University of Cebu -Main Campus.

Suma pa niya nga makatabang ra kaniya ang iyang pamilya  apan sa karon nga panahon, kinahanglan gyud nga molihok  aron dili mapiang ang  iyang kapalaran sa umaabot nga mga adlaw.

Dunay nakuha nga pagtulun-an si Faith  samtang naka-community quarantine ug kini mao ang pagdawat sa kamatouran ug pag-adjust sa kalit-kalit nga sitwasyon

“ Daghan ko og  nakat-onan jud, naay mga butang na dili natu kontrolado , pero wala tay mabuhat,  mo -adjust jud ta kay kinahanglan  man ta mopadayon sa atung pang adlaw-adlaw nga kinabuhi. Laban ra jud,” niya pa.

Dili usab malikayan nga mingawon siya sa mga butang  atol sa panahon nga normal pa ang sitwasyon.

“Makamingaw pud baya ang normal nga life. Sa  wala pay pandemic kay halos tanan oras nako naa sa UC, mo -skwela sayo sa buntag, mo -duty sa  hapon sa skwelahan hangtud gabii. Usabay mauli nag alas 11 sa gabii  kay adto na magtuon. Makamingaw sad ang kakisaw mismo sa siyudad kung diin pwede ra ta mag lakaw-lakaw ug dali ra ta makaadto sa lugar nga atong gusto kauban ang mga suod nga higala ,” saysay pa ni Faith.

Matud pa niya nga kinahanglan gyud nga motuman sa health  protocols aron mahuman ang mga pagsulay.

“ Kinahanan gyud ang kooperasyon ug unity . Dili pwede nga mag iya-iya ta og desisyon tungod kay maoy gusto natu, naa gyud tay agdon sama sa protocols aron ma safe tang tanan. Sakripsiyo jud ta ,dili lang para sa atung kaugalingon kung di para nalang pud sa tanan hilabi na sa mga frontliners natu nga pwerting hagoa,” nagkanayon si Faith.

Sa ilang panimalay , grabe gyud ang ilang mga pamaagi aron malikayan ang coronavirus.

“Akong papa ga -work sa syudad, katung time na sige pa sya og duty, ig- uli niya kay mag -andam jud mig  water and towel sa gawas, ug adto siya maligo sa labhanan namo before mosulod sa balay. Ang  sakyanan na gigamit niya kay amoang sprayhan ug product na pang -disinfect. Kinahanglan pud ang kanunay nga panghugas  sa kamot ,” dugang pa niya.

Nihatag usab siya sa iyang opinyon sa lenggua sa ubang tawo nga matud pa gahi og ulo ang mga Sugbuanon.

“Dili tanan, pero aduna juy uban, unta lang malamdagan na ang mga badlungon, pero di pud ta ka basol sa tao kay lain-lain man jud tag sitwasyon. Mangayo lang jud tag guidance sa Ginoo pinaagi sa pagsampit niya na unta puhon mahapsay na ang tanan ,” panapos pa ni Faith.

Gawas sa Miss Alegria 2018 ug Binibing Talibon 2019 , ang uban niya nga mga titulo naglangkob sa  , Festival Queen First runner up 2015 - UC MAIN JHS,  Miss AWS 2017 (Association of Working Scholars) sa University of Cebu METC,  Miss CWS First Runner Up (Council of Working Scholars) 2017,  Miss Madredijos Eco Tourism 2018 ,  ug Miss UC-METC  First Runner up 2018