Sinulog Idol Seaon 11 mosikad na!

CEBU, Philippines – Mosikad na karong gabii ang   Sinulog Idol Season 11 nga ipahigayon diha  sa Fuente Osmeña Circle. Kanunay na gyud atangan sa mga Sugbuanon  sa matag  alas otso sa gabii ang pagtigi sa  12 ka  finalists ug maproklamar ang champion atol unya sa grand finals karong Enero 16.

Adunay usa nga matangtang sa matag gabii nga kompetisyon nga nagtangag og nagkalain-lain nga genre.

Una na nga gibutyag sa   Sinulog Idol project director  Gloria Villarojo nga ubay-ubay gyud ang   ni-audition sa maong kompetisyon ug  gihashasan nila ngadto na sa  12 ka finalists. Ang mga finalist  karong tuiga motigi matag gabii alang sa    Idol’s choice, Broadway, Karaoke, Bisaya, Rock,  ug Jam night.

Dili basta-basta ang training sa finalists, matag adlaw  ang ilang rehearsal . Inigkahuman  sa ilang show matag-gabii, adunay  mahitabo nga general evaluation nga dumalaon sa mga  hurado nga naglangkob nila ni Banat News Hugyaw editor ug online show host  Ryan Mark, voice coach  Jay Unchuan ug kanhi   Pinoy Dream Academy scholar Apple Abarquez.

Ang maong kalingawan  gidumala sa Cebu City Government, Sinulog Foundation Inc., inubanan sa pag-abag sa  Soundtraxx Productions Studio.  Ang Platinum  Karaoke maoy presentor sa maong show karong tuiga.

Natukod ang maong  kompetisyon  aron mailado og samot  ang mga Sugbuanon sa natad sa pagkanta   sa nagkadaiyang dapit sa kalibutan. Ang 12 ka finalists sa Sinulog Idol 2020 naglangkob nila Stephanie Dugaduga, Thea Monterde Chacha Labado, Jehramae Trangia, Shandee Hafeel, Chreystle Gealogo,  Jedu Ligan, Maverick Nineza, Ranni Cane, Lloyd Abesia, Chris Olano  ug Tolits Alia.