#DiyosnongTal

Name: Mikhail Arrogante

Address: Lapu Lapu City

Birthdate: September 10, 1974

Facebook Account: Mikhail Arrogante / Cebu Best Wedding Photographer

Email Add: [email protected]

CEBU, Philippines — “Labing dakong challenge isip usa ka photographer mao nga unsaon nimo paghatag ang dakong expectation sa imong client, imong ihagit ang imong kaugalingon kanunay to do your best, to create something you haven’t done before and to explore new things bisan pa man kapila kana magbalikbalik anang hotela o simbahana.”

Mao kini ang pagpaambit sa garbo sa mga Oponganon nga si Mikhail Arrogante kun diin ang  track record sa photography dili  na malalis.

Kapin sa 20 ka tuig  na  siyang nahimong photographer ug sulod sa maong katuigan, ubay ubay na siya’g napamatud an sa pagpangodak nga miila sa kaligdung ug dekalibre niyang abilidad dili  lang sa Sugbo ug sa tibuok Pilipinas kundi lakip sab sa tibuok kalibutan.

Mapasigarbuhon niyang gipaambit nga nakadawat siya og Accolade of Excellence Award sa Wedding and Portrait Photographers International Photo Competition didto sa Las Vegas, U. S. A niadtong 2010.

Back- to-back first placer sab siya sa Sa Nikon ug Kodak National Photo Contest atol sa WHP Photo Congress niadtong 2007 nga gipahigayon didtu sa kauluhan.

Maka tulo sab siya ka higayun nga nahimong grand champion sa Sinulog Photo Competition.

Dugang pa niya, ubay ubay na gyud nga mga award giving body ang miila sa iyang katakus isip photographer ug iyang giangkon nga ang maong kahigayunon maoy nakapadasig kaniya og samot nga mapalawman pa og maayo ang iyang talento.

Sa dakong kalamposan sa iyang kinabuhi , ang  Kahitas-an gyud maoy nag-una sa listahan nga iyang gipasalamatan..

Ubay -ubay na sab nga celebrities ug mga tinahud nga personalidad sa nasud ang nahimo niyang mga kliyente.

Pipila sa dili niya malimtan mao silang Alma Moreno, Mayor Tomas Osmeña kauban ang asawa niining si Konsehal  Margot, Señorito Michel ug Señorita Amparito Lhuillier, Board Member Sun Shimura, mga prominenting Chinese families sa Sugbo ug uban pa nga mga politiko.

“Dili nako malimtan silang tanan, labi na og malilian nako og balik ang ilang mga files sa kasal ug ilang mga shoot. Bisan  daghan daghan nga mga panghitabo nga  akong mga nasaksihan isip photographer ,apan naay usa ka event nga mitusok sa akong kasing kasing, diin during wedding, ang amahan masakiton, apan naninguha gyud nga makatambong sa kasal nga kuyog pa ang mga nurse, ambulansya ug mga ekipo niini. Samtang mipaso ang iyang anak  , dili  mapugngan nga mahimo ko’ng emosyonal nga nakita naku ang dakong gugma sa amahan ngadto sa iyang anak, ug isip usa ka photographer, imo kining ma- capture ang tanang emosyon alang sa umaabot nga henerasyon sa maong pamilya,” saysay pa niya.

Pagbalik lantaw ni Mikhail sa iyang kagahapon, usa siya ka government employee kaniadto ubos sa Waterworks and Engineering Department sa panahon ni Governor Tingting Dela Cerna.

Paghuman niya sa iyang kontrata sa Province of Cebu niadtong 2006, adunay higayun nga nitikang   siya sa photo studio sa iyang uyuan nga si Lemuel Arrogante hangtud nga nagsige na siya og balik balik sa shop niini.

Tuod man, ang maong higayun maoy nakapahigugma niya sa photography ug tungod niini, naagni siya sa pag kat -on sa  pagpangodak.

Mapasalamaton sab siya sa iyang  uyuan sanglit mao man kini ang usa sa mitudlo sa basic techniques niini.

Sa kasamtangan, gusto siyang mahinumduman sa kadaghanan isip dakong parte sa espesyal nga adlaw sa mga kliyente nga mikuha kaniya.

Sama sa kasal, di lang siya kutob sa pag- pangodak niini kun dili, gipakalakip sab niya ang iyang kaugalingon nga kabahin na sa kinabuhi sa newly- wed dungan sa paghimong dakong saksi sa panaad sa magtiayon sa altar sa kaminyoon.

Inspirasyon niya sa pagkab-ot niya sa iyang damgo nga mamahimong inila nga photographer mao ang iyang pamilya.

Way puas sab ang iyang pagpasalamat sa Labawng Makagagahum sa talento nga gihatag  kaniya nga maoy nagsilbi niya nga panginabuhian.

“Isip photographer, it’s a continuing education. Matod pa, your picture is as good as your last. And as long as you are still able, no one can stop you from doing what you love. Sa pagkakaron, gawas sab sa akong pagka-photographer, nag alagad sab ko sa Ginoo pinaagi sa Commission on Family and Life sa Santo Rosario Church,”panapos pa niya. - Jaypee Pleños Lao Ento