Pinay ang champion

CEBU, Philippines — Pinay gyud ang midaog sa X Factor Romania Season 8. Ang Pinay mga taga Cavite nga si Bella Santiago mao ang natuboy nga kampyon sa maong kompetisyon. Nahimong winning piece ni Bella ang Love On Top ug Crazy In Love nga orihinal nga gipasikat ni Beyonce Knowles.

Pinaskohan sa followers

Palahi gyud ang pinaskohan nga gidalit ni Paolo Ballesteros sa iyang followers sa Instagram gumikan kay makeup transformation na usab ang iyang gipakita atol niadtong Pasko. Sa makaduhang higayon, gisunod na sab niya ang awra ni Miss Universe 2018 Catriona Gray. Ubay-ubay sab ang nakauyon sa maong look gumikan kay nasunod gyud niya ang mga importante nga features sa dagway ni Catriona.

Mabdos na sab

Gianunsyo ni Camille Prats pinaagi sa iyang social media account nga nagsabak na sab siya pagbalik  . Mao na kini ang ikaduhang anak  nila ni John  Yambao human sila  makasal niadtong Enero 2017.

Wala maglisod

Gisaysay ni Direk Erik Quizon nga wala gyud siya maglisod sa pagmugna sa intimate scenes sa pelikula nga iyang gihatagan og direksyon nga “One Great Love”. Matud pa ni Direk Erik nga dali niya napasugot si Kim nga buhaton ang maong eksena gumikan kay nauyonan  mismo ni Kim ang detalye sa maong eksena. Dugang pa niya nga bisan og unang higayon kini ni Kim nga buhaton ang maong eksena apan bilib siya nga nahatag ni Kim ang buot niya nga mahitabo sa maong eksena sa pelikula.

Best Christmas gift

Matud pa ni kanhi It’s Showtime host nga si Eric Tai o mas naila isip si Eruption nga best Christmas gift gyud nga lalaki ang gisabak sa iyang asawa nga si Rona Tai. Dakong kalipay nga gibati karon ni Eruption gumikan kay taud -taud na sab siya nga naghuwat nga makaangkon sa iyang kaugalingon nga liwat. Dugang pa niya nga lalaki sab gyud ang gusto niya nga mahimong anak ug gihatagan gyud siya niini sa Ginoo.

Nangandam na

Nangandam na gyud si Robin Padilla alang sa iyang umaabot nga proyekto nga sugdan na og gama sunod tuig. Lakip sa iyang pagpangandam mao ang pagpa-opaw nga sama sa itsura karon ni PNP Chief Ronald “Bato” Dela Rosa. Wala pa midetalye si Binoe kalabot sa maong proyekto apan gitataw niya nga unahon pa og gama ang proyekto nga bidahan nilang duha ni Piolo Pascual.

Mapasalamatonsi Tony

Mapasalamaton gyud si Tony Labrusca sa dagan sa iyang tuig karon. Gipadayag ni Tony ang iyang dakong pasalamat pinaagi sa iyang social media account. Maingon nga mihumot gyud pag-ayo ang pangalan ni Tony human migawas ang iyang gibidahang proyekto nga “Glorious”. “I just want to point out how much grateful I am for all the blessings God has given me this year”, pulong pa ni Tony.

Sang’gre production

Midetalye na si Sunshine Cruz nga nahuman na sila og shoot sa ilang iflix movie kun diin makauban niya ang iyang mga Encantadia sisters nga sila si Iza Calzado, Karylle ug Diana Zubiri. Gawas nga sila ang bida, sila usab ang nanghikutar sa luyo sa kamera. Gani, gipanganlan nila kini og Sang’gre Production gumikan kay maingon nga sila mao ang orihinal nga bida sa serye nga Encantadia.

Gipakpakan ang pag-arte

Gipakpakan gyud ang performance ni  Anne Curtis sa pelikula nga iyang gibidahan nga “Aurora”. Ang maong horror-thriller film nipakita sa mga nahitabo sa nalunod nga barko nga Aurora didto sa Batanes. Tsika pa sa mga nakakita nga haom gyud ni Anne ang maong karakter gumikan kay isog gyud ang personalidad nga gipakita niini. Gani, nilutaw usab ang  kabansay ni Anne sa pag-arte.

Gipahimangnoan ang Bashers

Mitingog na si Sue Ramirez kabahin sa nang-bash ug nang-harrass kaniya sa social media. Gani, sa iyang tweet, mipagawas na siya og pahimangno alang sa tanan niyang bashers. “To everyone who has the nerve to bash people online, always take note that there are laws against cyber bullying. do not wait for us to fight back”, suma pa ni Sue.