Pagpahimulos sa bonus

CEBU, Philippines — Lami na kaayo ang feeling karong panahona ilabi na kun mosulod ka og mga mall kay mosugat gyud kanimo ang pasko-hanong awit hinungdan mosamot pud ang gana sa pagpamalit sa ilang mga baligya.

Mitungtong naman ang buwan sa Disyembre busa mapahiyomon kaayo ang mga tawong dunay trabaho  gumikan kay makadawat na og 13th month  pay  ug dugangan pa gyud og Christmas bonus.

Pahimagno lang , ayaw  gyud iwaldas og todo kun  makadawat mo og daghang salapi karong panahona. 

Puwes, ania ang tips nga namantala sa www. brighterlife.com kun unsay angayan nga buhaton sa madawat nimo nga grasya karong buwana.

1.Ayaw kalimot sa pagahin alang sa  imong kaugalingon.   Importante kaayo nga hatagan pud nimo og reward ang imong kaugalingon human ka nagkugi sa imong trabaho. Mobakasyon ba kaha sa nindot nga lugar, kanang dili kaayo dako og gasto.

2.   Paneguro daan ilabi na kun duna’y emerhensya. Paghipos og kuwarta ug dili kini gastohon sa dili kaayo importante nga mga butang. Sa panahon nga duna’y emerhensya nga mahitabo kanimo, dili ka magkapuliki og pangita og kuwarta.

3. Mahimong patubuon ang kuwarta. Aron mabulukon ang imong pagtigom, mahimo kang mo-invest aron maka-kuwarta ka.  Ipaneguro lang gyud nga patok nga negosyo ang imong sudlan.

 4.  Ayaw kalimti ang imong utang.  Pipila sa mga tawo ang magpatuyang lang og shopping sa mga mall kun makahupot na sa ilang extra nga salapi. Ayaw kalimti ang pagbayad sa nahibilin nimo nga mga utang.

5. Paambit sa grasyang nadawat.  Gawas sa paggahin og budget sa mga importanteng butang,  labing maayo pud nga mopaambit ka sa imong nadawat ngadto sa  ubang tawo , sama sa feeding program o ba kaha magpa-party alang sa mga pobre nga bata.