Wait and shall be crowned

CEBU, Philippines — Ang mga maanindot nga mga kahigayonan maabot lang gyud kini sa tukmang panahon. Kun dili man karon, seguradong maabot ra gyud kini sa umaabot nga mga adlaw. Mao nga gikinahalangan nga paabuton gyud kini ug mosalig lang sa mga plano sa Kahitas-an gumikan kay aduna gyuy  gitagana sa matag usa kanato.

Mao kini ang dagan sa istorya sa usa ka inahan ug nahimong Mrs. International 2017 nga si Jessica “Jee” Eribal-Candelasa.

Alang kang Jee, dili mahimong babag ang kaminyuon ug ang pagbaton og anak aron dili na mapadayon ang pangandoy nga mahimong usa ka beauty queen.

Magdepende lang gyud kini kun adunay luna alang sa mga kababayenhan nga makahimo pa nga makasalmot og indigay sa pagrampa.

Gani, usa na ang Mrs. International sa mga indigay nga nagbukas og pultahan sa inahan  sama ni Jee aron nga makapabuhagay ug makapadayag pa sa kaugalingon pinaagi sa ingon niini nga matang sa indigay.

Si Jee usa na karon ka inahan sa iyang 16 anyos nga batan-ong anak. Wala niya damha nga magpadayon ang iyang damgo nga mahimong usa ka beauty queen.

Gitug-an niya nga karon nga naminyo na siya, karon lang niya naangkon ang mga titulo nga wala niya naangkon niadtong dalaga pa siya.

“Katong dalaga pa ko kay wala jud ko makadaog”, suma pa ni Jee.

Kaniadtong wala pa ang Binibining Cebu, gisalmotan ni Jee ang Miss Cebu-Tourism. Nalakip siya sa mga finalist niini apan wala siya mapalari nga makaangkon og titulo.

Gani, misalmot sab si Jee sa Mutya ng Pilipinas Central Visayas niadtong 1998 apan wala gihapon nakadaog.

Ang Mutya nga Pilipinas Central Visayas mao ang labing una  nga indigay nga nasalmutan ni Jee.

Dugang pa nga wala gyud siya nawad-an og paglaum nga mahimong usa ka beauty queen.

Sa dihang naminyo siya, wala siya magtuo nga mapahigayon ang mga indigay alang sa mga inahan nga mao ang My Pretty Mama.

Misalmot siya nga sa pagpangagpas nga makarampa og balik sa entablado .

“Daghan –daghan sab gyud mi ang ni-screen ato kay mao man toy pinaka-first nga ni- open ang mga pageant sa mga mama”, matud pa ni Jee.

Apan wala siya magtuo nga mao na kini ang sinugdanan sa paghatag og katumanan sa iyang hagbay ra nga gipangandoy--- ang makakuha og titulo.

“My Pretty Mama was my very first title. Wala gyud ko mag-expect nga maka-crown ko nga minyo nako”, suma pa ni Jee.

Ang iyang labing unang titulo nasundan kini niadtong 2013 kun diin nalangkat sab niya ang Mrs. Philippines-Globe.

Human sa pipila ka tuig, siya ang napilian ni Ms. A Importante nga mao ang mahimong mobandera sa Sugbo nga mosangka sa Mrs. International-Philippines nga didto gipahigayon  sa kauluhan sa miaging tuig.

“I was hand-picked kay wala na man tay pageant kaayo diri sa Cebu for moms and then ni-compete pa ko sa Manila before para maka-gain ko og rights para makarepresent sa Philippines for Mrs. International”, suma pa niya.

Wala niya damha nga maabot sa ingon niini nga punto sa iyang kinabuhi nga magsagunson ang mga dagkong titulo nga maangkon niya human siya naminyo.

Niadtong nagtungha pa si Jee, maingon niya nga calling gyud ang iyang pagka-beauty queen. Niadtong college pa lang siya, nabantayan sa nabantog nga designer sa Amato Couture nga si Furne One ang kaanyag ni Jee.

Mao nga gidani siya ni Furne nga mosalmot una sa modelling search nga GAP.

“After ato kay mao nato ang naka-build up sa akong confidence nga pwede diay ko ma-model kay conscious man gud ko sa akong height kay when I was still young kay lahi man gyud sa probinsya kay kung taas ka kay tan-awn ka, sungugon ka. So wala ko nag-expect nga matagaan ko og opportunity sa modelling”, saysay pa niya.

Human sa iyang pagsalmot, gitabangan siya ni Furne nga makaangkon og mga exposure ug gibaid siya niini nga  mahimong maayo nga model. Gani, nahimo si Jee nga cover girl sa lokal nga magazine ug mga mantalaan dinhi sa Sugbo.

Sa pagbalik tan-aw ni Jee sa iyang kaagi, maingon ni Jee nga dako og gikatabang ang modelling kun asa na ang iyang naabot karon sa kinabuhi.

Human siya nga makahuman sa iyang pagtungha, midayon siya sa pagsalmot og beauty pageant.

Bisan og wala man siya makaangkon og mga dagkong titulo niadtong dalaga pa siya, apan tungod sa iyang mga kasinatian sa modelling, mao kini ang nagtuklod kaniya aron ipadayon ang iyang damgo nga mahimong usa ka beauty queen.

Sa pagtapos sa iyang tuig isip reigning Mrs. International, gusto niya nga mahinumduman nga siya ang rayna nga isog ug kanunay nga madasigon, kanunay nga andam sa mga posilibidad sa kinabuhi ug dili gyud mohunong kun dili makuha ang gitinguha sa kinabuhi.

Alang kaniya ang paghupot og titulo adunay nagpahipi nga responsibilidad  sa komunidad. Mao kini ang hinungdan nga aktibo gyud siya sa mga kalihokan  nga naghatag og tabang sa mga kabos nga bata.

Q&A

BNH: Unsaon nimo pag-describe ang imong kaugalingon nga wala pa mahibaw-an sa uban?

JEE: I may look like very unapproachable but if they know me better, they would discover nga I am someone nga ilang mahinabi   nga bisan  under the sun  kay makasakay rako. Usa pud ko ka emotional woman.

BNH: Do you ever feel insecure sa imong  co-candidates sa katong mga panahon nga niapil kag beauty pageants?

JEE: Yes, because I really find myself very skinny kay mao man gyud na ang ilahang isungog sa akoa nga skinny kaayo ko.

BNH: Unsa ang imong gikabisihan gawas sa imong pagka-Mrs. International?

JEE: Akoang work, akong career as part  sa HR sa usa ka company.