Resulta sa pag-stalk og ex

CEBU, Philippines — Dili ika-deny nga uso kaayo karon ang social networking sites, hinungdan nga dali ra kaayo ma-search ang gipangbuhat sa ubang tawo.

Nauso na kaayo ang pag-stalk, ug mao kini ang mahitabo usahay sa mga tawo nga bag-o lang nabuwagan.

Pipila kanila mo-stalk sa social media account sa ilang ex aron masayod sa gipangbuhat niini.

Ang uban, bisan dugay na nga buwag sa ilang ex, ganahan pa gyud mohirit sa pagsuta kun naa na ba’y  bag-ong  uyab ang ilang mga ex.

Suma pa sa www.thehealthsite.com, nga kinahanglan nga likayan ang maong butang gumikan kay duna’y dili maayong epekto nga mahatag niini.

Kini sama sa:

1. Posibling masakitan na pud ka og balik kun pananglitan magbalik mo niini. Dunay mga tawo nga kun makahibaw nga wala pa’y bag-ong inspirasyon ang ilang ex, magpakita sila og motibo nga magbalik sila. Apan ang kuyaw niini, basin pasakitan na sad ka og balik busa dili gyud maayo mo-stalk sa inyong ex. Pasagdihi na lang sila sa mga butang nga bag-o nila nga gikalingawan.

2. Posibling mabanhaw ang imong gugma sa maong tawo. Maka-discover pa ka kun unsa diay kanindot ang imong ex. Imbes plano nimo nga kalimtan siya, magkasalimuang  na hinuon ang imong hunahuna.

3. Sa pagsige nimo og stalk kaniya, magsige na hinuon ka og kumpara sa imong istado ug sa kinabuhi sa imong ex. Pananglitan makabaton kini og bag-ong karelasyon, magsige na ka og kompara sa imong kaugalingon ug sa bag-o niya nga uyab. Dili na ka angayan mohatag og atensyon niini aron dili ka-feel og samok sa imong hunahuna.

4. Imoha ra nga gitunto ang imong kaugalingon. Sanglit ang pag-stalk sa imong ex posibling makatintal kanimo nga mohatag og dili maayong reaksyon sa iyang mga post.

5. Nagsakit-sakit ra gyud ka sa imong dughan. Sa pagsige nimo og check kaniya, maglisod na hinuon ka og move on sa inyong breakup. Imbes nahuwasan na unta ka, mobalik na hinuon ang kasakit nga imong na-feel sa una, sanglit dili na man siya makabalik kanimo ilabi na kung naa na siya’y bag-o.