Layat Alang Sa Pangandoy

Name: JOSHUA CABILIN YERRO

Nickname: Wakwak, Wawa

Age: 17

Address: Ormoc City

Height: 6’1

School/University: University of the Visayas-Main Campus

Year Level: Senior High School

Sport: Basketball

Basketball Team: UV Baby Lancers-High School

Favorites Song: Maging Sino Ka Man

Lucky Number: 6

Actor: Robin Padilla

Actress: Julia Barretto

Basketball Players PBA: James Yap, Calvin Abueva

NBA: LeBron James

Ideal Girl: Tall, taas og ilong and chubby figure

Bisan pa man sa iyang linghod nga pangidaron, tataw nga mas hingkod na siya og panghuna-huna ug panglantaw sa kinabuhi itandi sa mga kaedad niini. Kini tungod sa iyang kasinatian sa bata pa nga naghatag kaniya og ideya unsa kalisod ang kinabuhi.

Siya mao ang garbo sa Ormoc City nga si Joshua Yerro, 17 anyos, miyembro sa University of the Visayas Baby Lancers ug kinsa nahimong back-to-back Most Valuable Player (MVP) sa Central Visayas Regional Athletic Association (CVIRAA) sa tuig 2016 ug 2017.

Syete anyos siya dihang nagsugod siya og duwa og basketball diin iyang uyoan ang nagbansay kaniya aron mahimo siyang maayong laki sa maong sport. Wala matod pa siya nagdahom nga ang uyamot nga bata lang kaniadto mahimo na karong MVP sa nagkalain-laing basketball competitions.

Sa wala pa niini natilawan ang mga matam-is nga kalamposan karon, niagi una siya og mapait nga kasinatian. Ikaduha siya sa upat ka managsuon sa wala’y trabaho nga inahan ug security guard nga amahan. Matod pa niya, kasagaran nilang sud-an sa bata pa kay noodles ug buwad.

Gipaambit sa batan-ong basketball player nga sa nag-edad pa siya og 11 anyos nagtrabaho na siya sa isdaan didto sa merkado sa Ormoc.

Alas kuwatro pa lang sa kadlawon magmata na si Joshua ug magsag-ob og tubig sa dagat aron himuong ice sa isda.

“Molukdo ko’g banyera, bisan bug-at gikaya lang gyud para makatabang sa pamilya,” butyag pa niya, diin P230 bugti sa pipila ka oras nga trabaho.

Giasoy niini nga alas 6 sa buntag na siya mauli sa ilaha gikan sa merkado ug dali siyang maligo aron mosulod sa iyang klase.  Nagtungha siya sa Linao Elementary School diin asoy pa niya wala siya’y uniform ug jersey shorts lang ang kanunay niyang isul-ob.

Ang nagpasulod niya sa isdaan mao ang iyang uyoan. Ug sa dihang nahawa iyang uyoan didto, nawad-an sab siya og trabaho. Maayo na lang nga pila ka buwan ang nilabay nakakita siya og laing trabaho. Kini mao ang mag-ihaw ug mag-asal og baboy.

Suma pa niya upat ra ka oras iyang tulog matag adlaw sanglit magmata na man siya  og alas 12 sa tungang gabii aron mo-duty  sa ihawan ug aslanan.

Alas sais sa buntag mahuman iyang duty sa ihawan dayon mouli siya sa ilaha aron mag-andam padulong sa eskwelahan.  Madawat siya og P160 nga bayad sa iyang pagtrabaho.

“Sa kalisod ba, ganahan ko motabang sa akong pamilya maong nangtrabaho ko,”sigon pa niya nga tulo gyud katuig nga nagtrabaho sa aslanan.

Nipadayon siya og tungha didto sa Linao National High School diin niapil siya og basketball team ug ang maong grupo maoy representante sa Ormoc City para sa Eastern Visayas Regional Athletic Association (EVIRAA) sa tuig 2015.

Gipasigarbo niini nga sa una niyang pag-apil sa EVIRAA  nalangkat sa ilang team ang kampiyonato. Ug tungod niini, nadiskobre siya ni Coach Van Parmis ug giingnan siya nga dad-on sa University of the Visayas aron mu-try out pagka UV Baby Lancers.

Pag-abot niya sa UV, nakurat siya pagkakita sa mga players sa Baby Lancers.  “Pag-abot nako nakaingon ko nga dagkoa nila oy, dili ko mada dinhi,” butyag pa niya.

Pero tungod sa iyang pangandoy, nagpabilin siyang positibo. Duha ka adlaw matod pa siya nagtry-out ug human niini nipauli siya sa Ormoc samtang nagpaabot sa resulta.

Hangtod nga gitawagan siya ni Coach Van ug gipahibawo nga nadawat siya isip bag-ong player sa Baby Lancers ug gikinahanglan nga motikang dayon dinhi sa Sugbo aron magsugod na og bansay.

“Three days ko naghilak kay gimingaw ko’s akong pamilya, labi na ni mama, mama’s boy man gud ko,”asoy pa niini kinsa 15 anyos sa dihang nalayo sa iyang ginikanan.

Apan naningkamot lang gyud siya ug nagpakalig-on. Gitambagan siya sa iyang mga kauban nga dili magmagul-anon.

Una niyang position sa ilang team mao ang shooting guard ug second shooter. Nagkupot siya sa maong position gumikan sa kataas sa iyang layat hinungdan nga didto pa lang sa ilaha, gianggaan na siya’g “Wakwak” sa Ormoc”.

Sa paglakat sa panahon, nabansay siya og maayo og duwa ubos sa maong team ug nakadawat og daghang mga medalya. Sa pagkakaron, nikapin na og 50 ka mga medalya ang iyang nadawat.

Nahimo siyang MVP sa National Basketball Training  Camp (NBTC) ug nalakip sa Top 24 NBTC All Stars diin tulo ra sila nga taga Sugbo ang nasulod. Nahimo sab siyang Most Outstanding Player sa PSSCB, usa ka association nga gilangkuban sa mga sikat nga unibersidad sa nasud.

Ug ang labing bag-o niyang kadaugan mao ang pagkadaog isip MVP sa CVIRAA sulod na sa duha ka tuig.

“Wala ko nag-expect kay parehas man me naningkamot sa korte,”niya pa.

Wala’y puas nga kalipay ang iyang gibati nga siya gihapon ang gituboy nga MVP sa nakalabay nga CVIRAA. Giisip niyang sekreto sa pag-angkon sa titulo mao ang kakugi ug pagsalig ngadto sa Ginoo.

“Tungod sa hardwork ug prayer sa Ginoo. Kay Siya raman gyud maghatag nato’g kusog,”asoy pa niini.

Giasoy sab sa MVP nga kanunay siyang mag-ampo nga unta giyahan siya kanunay sa Ginoo sa iyang pagtungha nga dili siya mahagbong kay dili matod pa sayon ang pagdungan sa pagtuon ug pagduwa og basketball.

“Lisod gyud siya. Ako lang gyud gi-balance akong time,” sigon pa ni Joshua kinsa miasoy nga mag-practice sila alas 6 hangtod alas 8:30 sa gabii.

Daghan matod pa ang motawag kaniya og “idol” human siya nahimong back-to-back MVP sa CVIRAA. Apan taliwala sa maong kalamposan, nagpabilin kining mapaubsanon. “Wala may nausab nako, kung unsa ka sa una dapat mao ra gihapon ka. Stay humble lang gyud,”tambag pa ni Joshua.

Mitug-an si Joshua nga tungod sa iyang sunod-sunod nga pagkadaog pagka-MVP daghan ang nangulitawo kaniya nga mga dagkong universities sa kaulohan aron adto siya patunghaon og kolehiyo.

Buot matod pa siyang mokuha og kursong Criminology sa kolehiyo. Pagkakaron, wala pay uyab si Joshua ug dili pa matod siya ganahan mosulod og relasyon kay buot siya magpokus sa iyang pagtungha ug pagduwa aron makatabang siya sa iyang pamilya.

“Akong inspiration kay akong parents. Maningkamot ko kay para makatabang ko nila,”niya pa.

Gibutyag sab niini nga idolo niya sa PBA mao si Calvin Abueva kay daw aduna kini kasing-kasing moduwa. Gawas sa basketball,moduwa sab siya og baseball.

Sa kahumot na sa iyang pangalan karon, kanunay niyang gisulod sa iyang alimpatakan nga:

“Dili ko magbinuang, dili ko magpadala sa tentasyon, dili pasagdan ang health ug dili sa mag-uyab-uyab.”

Q & A

BNH: Unsay kaugalingon nimo nga depenisyon sa Love?

Joshua: Love gives you an inspiration.

BNH: Unsa pa imong pangandoy?

Joshua: Pangandoy nako nga mahimong professional basketball player ug makaduwa puhon sa PBA.

BNH: Kinsay buot nimong pasalamatan?

Joshua: Daghan kaayong salamat sa akong mama, papa ug akong mga igsoon, sa inyong suporta nga wala ko ninyo pasagdi. Daghang salamat sab sa mga coaches sa UV nga nitabang nako.