Nahuman na

CEBU, Philippines — Nahuman na niadtong Domingo ang shooting sa pelikulang Sid and Aya, Not A Love Story  nga gibidahan nila ni  Dingdong Dantes ug Anne Curtis.  Nagpanikad na ang duha sa mahimong reaksyon sa mga tawo kalabot sa ilang tandem.  Posibleng sa katapusang bahin sa Mayo ang playdate niini.

Motigi sa Avengers

Molugwa na sa mga sinehan ugma ang Pinoy movies nga My 2 Mommies sa  Regal Films ug  Squad Goals sa  Viva Films. Panghinaot sa mga tagdumala sa maong mga pelikula nga dili kini maapektohan sa Avengers nga padayon nga gisalida sa mga sinehan karong panahona.

Civil lang

Gitataw ni Sofia Andres nga civil lang ang tinagdan nila ni Diego Loyzaga. Una na nga gidungog nga nagkauyab sila kaniadto apan wala magdugay gumikan kay duna’y mga butang nga dili sila magkasinabtanay.

Suki sa international singers

Nahimong paborito sa international singers ang Pilipinas gumikan kay kanunay gyud nga dumugan ang ilang mga concert dinhi sa nasud. Kahinumdoman nga nagsagunson ang mga concert sa Pilipinas sa langyaw nga singers.  Kini sama sa  Incubus, Paramore, Fifth Harmony, Katy Perry, John Legend, Ed Shee-ran, The Script, Harry Styles, ug   Bruno Mars. Mosikad usab sa nasud sila si Celine Dion ug ang former member sa One Direction nga si Niall Horan.

Todo suporta sa PPP

Nihatag og init nga suporta si Jaclyn Jose sa  2nd Pista ng Pelikulang Pilipino nga gipasiugdahan sa  Film Development Council of the Philippines. Kahinumdoman nga nalakip sa labing una nga PPP ang pelikula kaniadto ni Jaclyn nga Patay Na Si Hesus.

Pasok si Sheena

Ang Cebuana singer nga si Sheena Belarmino maoy labing una nga weekly winner sa second season sa “Your Face Sounds Familiar Kids” niadtong Domingo. Gisundog niya si Sarah Geronimo pinaagi sa pagkanta og “Tala.””I know how hard it is to move, follow choreo, give it your all, plus give it your all sa pagkanta. Naisabay mo. Maraming magaling kumanta or marunong kumanta, pero hindi lahat ng magaling kumanta ay maganda ang boses. Ikaw, maganda ang boses mo at magaling kang kumanta,” mensahe pa sa hurado nga si Sharon Cuneta .

Gipasalida sa Japan

Gitambongan gyud nila ni James Reid ug Nadine Lustre ang special screening sa pelikula nila nga “Never Not Love You” didto sa Japan. Mapasalamaton ang JaDine gumikan kay gawas sa Japan, gipasalida usab ang ilang pelikula sa lain pa nga nasud.

Komportable ra

Tulin gyud ang dagan sa shooting didto sa Greenland sa umaabot nga pelikula nilla ni Aga Muhlach ug Alice Dixson.  Komportable ra ang duha busa taod-taod na sila nga wala nag-uban pagbalik sa usa ka proyekto. Katapusan sila nga nag-uban sa 1991 movie nga “Joey Boy Munti: 15 Anyos Ka sa Muntinlupa.”

Busy ang career

Nalingaw pag-ayo si  Bailey May sa pagtuyok-tuyok sa bisan asang dapit sa kalibutan.  Nasayran nga nalakip si Bailey sa global pop music group nga Now United nga gihulma ni Simon Fuller.  Gitataw hinuon ni Bailey nga  magpabilin  gihapon ang iyang career dinhi sa nasud  bisan paman nga nakabaton siya og international career.