Mary Jane hingpit nga naghugyaw!

CEBU, Philippines - Hingpit nang nakompleto ang Grand finalists sa Sinulog Idol Season 8 human laing usa ka idol na usab ang nalagas sa gipahigayong 6th elimination night niadtong Miyerkules sa gabii sa Fuente Osmeña Circle.

Rock Night maoy nahimong tema atol sa maong takna sa binakbakay.

Sama sa naandan, nalukop sa mga head banger music ang tibuok Fuente.

Natapos ang karera ni Lorymae Baring(20) sa maong pagpanimpad sa Sinulog Idol human wa mauyuni sa mga hurado ang iyang gipakitang performance sa maong kagabhion.

“Kung sa duwa pa mura kag nagduwa og volleyball pero ang imong lihok murag gaduwa ka og chess, vocally you were there but imong over-all performance, it didn’t work for me,” si coach Jay Unchuan nagkanayon.

Giawit ni Yumae ang nabantog nga awit sa Paramore nga “Ignorance.” Siya maoy labing bag-o ug katapusang nalagas sa maong kompetisyon.

Samtang napabilib ang tanan sa breathtaking performance sa migawas nga Star of the Night sa maong round nga si Mary Jane Adolfo (21) nga lumad nga taga Cadulawan sa dakbayan sa Talisay human niya awita ang gipabantog ni Lady Gaga nga “Bad Romance.”

Matud pa sa mga hurado nga wa sila mag-expect sa gipakitang taras ni Mary Jane sa maong kagabhiun.

”I was not expecting that from you tonight tungod kay akong pagkaila nimo hilomon kaayo ka. Ikaw ang tawo nga kung dili pangutan-on di ra sab mutubag. But tonight, you are so different. So proud of you. Nigawas na gyud ang tinuod nga pagka ikaw,” si coach Apple Abarquez nagkanayon.

Sa next round na mahitabo ang Grand Finals sa Sinulog Idol Season 8.

Pagpaambit pa sa usa sa mga resident judges nga si coach Apple nga ang ilang gipangitang ultimate Sinulog Idol mao ang idol nga di lang maayong moawit kun dili ang katung adunay maayo sab nga pamatasan ug kahibawong makig-uban sa mga staff sa Sinulog Idol Production Team gikan sa mga Make-up artist ngadto na sa Technical Team. Gipangita sab niya ang pagka versatile sa usa ka mang aawit.

Dugang pa ni coach Jay nga ang Sinulog Idol ultimate winner kinahanglan sab nga di lang adunay dekalidad nga abilidad sa pag-awit apan makahibawo sab sa ensaktong pagtratar sa mga tawong nakapalibot kaniya sanglit matud pa niya ang nindot nga pamatasan sa usa ka tawo maoy makadala niya bisag asa.

Mas gipahugyaw ang maong kagabhion human mi-perform sa Sinulog Idol Stage ang nabantog nga Singing Priest nga si Father Jonas Mejares OSA.

Lakip sa mga grandfinalists mao silang Dave Alcano 22 nga mipahugyaw sab sa publiko human niya awita ang Rock Song nga “Lakas Tama”, Kristal Mae Dianon (20) sa iyang Rock Song nga Faster Closer.

Samtang mipabor sab ang maong kagabhion nilang Jan Echavarria (20), Mitsuko Cabillada (21), Aian Vincent Uba (22) human hingpit sila  nganli nga mamahimo sab nga mga grandfinalists sa Sinulog Idol karong tuiga.

Ang palarang mananaug sa Sinulog Idol 2017 makadawat og 50,000.00 samtang 30,000.00 ang madawat sa first runnerup ug 20,000.00 alang sa 2nd runner up. Wa pay labot niini sa ilang madawat nga laing papremyo gikan sa Kapandesal Coop.

Kining tinuig nga Singing Competition gidumala sa Cebu City Government, Sinulog Foundation Inc., ug Soundtraxx Productions Studio. (BANAT NEWS)