Angayan kitang malipay

Ang kalampusan sa Aldub usa ka kamatuoran nga nagtuyok ang kalibutan. “Bilog ang mundo” sa tagalog pa. Ug kay mao man kana ang kamautoran, kana nagsimbolo usab og kahigayonan alang kanatong tanan.

Buot pasabot, walay magpermanente nga kahimtang o sitwasyon. Nga, mausab gayud ang dagan sa panahon. Kun ikaw anaa sa ubos karon, nagkamang sa tumang kalisud, nag-antos sa kapobrehon, hinumdumi nga lingin ang kalibutan. Ugma damlag sa padayong pagtuyok niini, adunay posibilidad nga ikaw atua na sa ibabaw.

Kun magduhaduha ka pagtuo, hunahunaa ang AlDub. Kathniel, Jadine, ug LizQuen ang kanunay litukon sa mga dumadayeg. Ang ilang panagpares maoy naglanog ug gikagubtan. Apan sa pagtuyok sa kalibutan, nausab ang dagway sa kapalaran. Sa wala damha, kalit nga namugna, nahimugso ang Aldub ug mao karon ang gihisgutan na usab og maayo. Bilog ang mundo kasi.

Ila karong panahon, nganong dili mana nato dawaton? Nganong ihikaw man nato ang pagtahod ug pakpak nga atong gipauwan sa ubang mga panagpares nga mas nahauna kanila kaniadto?

Dili kinahanglang magsakit ang inyong mga dughan. Ug dili usab kinahanglang muluwat og mga sakit nga pulong aron pagbira sa Aldub paubos. Hinumdumi lang kanunay, bilog ang mundo. Buot pasabot sa subling pagtuyok sa kalibutan, aduna na usay laing panagpares nga mahimugso ug mupapha sa Aldub diha sa atong panumduman.

Panamini ang nahitabo sa Aldub. Himua kining inspirasyon aron ikaw madasig diha sa imong pagkinabuhi niining kalibutana. Paningkamuti nga sa lain na usab nga pagtuyok sa kalibutan ikaw makakapyot aron mahimutang sa ibabaw. Kana mahitabo kun ang imong tinguha kaluhaan nimo og paningkamot, ug ihangad nimo sa Labaw’ng Makagagahum.