Cinema One Originals, mas ‘intense’
MANILA, Philippines - Ang festival ng Cinema One na Cinema One Originals ay nagdiriwang ng ikasampung anibersaryo ngayong 2014. Intense ang tema ngayong taon, at binubuo ito ng full-length digital movies, short films, restored Pinoy classics at bagong obra ng mga sikat na direktor ang nasa lineup ng C1 Originals Film Festival.
Masasaksihan ang C1 Originals mula Nov. 9-18 sa Fairview Terraces, Glorietta, Trinoma, at Greenhills Dolby Atmos.
“Talagang bigger, bolder at better ang festival ngayon,” ani ni Cinema One Originals Channel Head Ronald Arguelles. “Kaya’t tinawag namin itong ‘intense.’”
Highlight ng festival ay ang pagpapalabas ng 10 digital films na napili mula sa mga napakaraming script submissions. Ang mga ito ay: ‘Di Sila Tatanda ni Malay Javier, Seoul Mates ni Nash Ang, Red ni Jay Abello, Violator ni Eduardo Dayao, Soap Opera ni Remton Slega Zuasola, Lorna ni Sigrid Andrea Bernardo, Bitukang Manok ni Alec Figuracion, Esprit de Corps ni Kanakan Balintagos, That Thing Called Tadhana ni Antoinette Jadaone, at The Babysitters ni Paolo O’Hara. Pawang malalaking mga artista ang mga magsisiganap sa mga ito. Ang ilan sa kanila ay sina Jericho Rosales, Angelica Panganiban, JM de Guzman, Angel Aquino, Lovi Poe, Rocco Nacino, at marami pang iba.
Mga makabuluhang obra mula sa Asya ang tampok sa Best of Asian Cinema section. Kabilang dito ang Winter Sleep, obra ni Nuri Blige Ceylan mula sa Turkey na nanalo ng Palme D’Or (grand prize) sa 2014 Cannes International Film Festival. Mayroon pang dalawang pelikula mula sa China: ang Black Coal, Thin Ice ni direktor Diao Zinan, winner ng Golden Bear Award sa 2014 Berlin International Film Festival, at ang historical love story na Coming Home ni Zhang Yimou na nag-premiere sa Cannes International Film Festival 2014.
Mga bago at ‘di pa nakikitang gawa ng indie filmmakers gaya nina Joel Ruiz, Adolf Alix Jr., Pam Miras at Eliza Esquivel ang kasali sa C1 Originals Short Film program.
Muling masasaksihan sa Restored Classics section ang Hindi Nahahati ang Langit, ni direktor Mike de Leon. Pinagbibidahan nina Christopher de Leon at Lorna Tolentino, ito’y isang melodrama na ipinalabas noong 1985 na base sa komiks ni Nerissa Cabral. Binigyang buhay muli ng ABS-CBN at Central Digital Lab ang nasabing pelikula.
- Latest
