Raymart at Claudine may panibagong problema na naman
PIK: Nagsimula na kagabi ang Disney Live! Three Classic Fairy Tales na treat sa mga kabataan ng Limitless Ventures.
Sa mga interesadong manood ng mga paboritong Disney characters, tuluy-tuloy na mapapanood ito sa Mall of Asia Arena ng 3:00 p.m. at 7:00 p.m. ngayong araw, at Biyernes hanggang Linggo ay mapapanood ng 11:00 a.m., 3:00 p.m., at 7:00 p.m.
PAK: Mangiyak-ngiyak si Kristel Moreno sa matinding panlalait na natanggap niya dahil sa gown na sinuot niya sa nakaraang Star Magic Ball.
Pinaglaruan ito sa social media lalo na’t naka-close up ang tiyan nito na kung saan nakikita ang lumulukot na bilbil.
Sabi ni Kristel, hindi raw bilbil ang nakikita sa gown niya, kundi damit lang daw iyun na parang lining na nasa ilalim ng gown.
“Okay lang ‘yung laitin nila ang suot ko, huwag lang po sana masyadong personal, sobrang pinababa nila ang pagkatao ko,” himutok ng aktres.
Kaya iniyakan daw niya nang husto iyun lalo na’t tinatawag daw siyang “pokpok” na sobrang pinababa naman daw ang pagkatao niya.
Damit lang daw ang laitin ng bashers, huwag naman daw ang pagkatao niya.
Sa litrato lang daw iyun na ikinalat sa social media, pero kung tingnan daw sa malapitan maganda raw at wala naman daw bilbil na lumalabas.
Gawa pa raw ang gown na iyun ng kilalang designer sa Hollywood na si Rocky Gathercole na gumagawa raw ng gown nina Paris Hilton, Jennifer Lopez, at Rihanna.
BOOM: Mukhang hindi na naman okay sina Claudine Barretto at Raymart Santiago, pero tahimik lamang sila.
Nag-post si Claudine sa kanyang Instagram account ng text message ng yaya ng anak nilang si Santino na second honor daw ang bagets sa class nila.
Kahapon naman ay ipinost din ni Claudine ang regalo niya kay Sabina dahil sa super high grades daw nito.
Hiningan namin si Raymart ng reaksyon sa launch ng Dickies kamakalawa ng gabi, hindi ito sumagot dahil hindi pa raw niya alam ang nangyayari ngayon sa kanilang anak.
Ayaw na lang niyang magsalita dahil ayaw na raw niyang may sasabihin na naman ang kampo ni Claudine.
Mas mabuting tahimik na lang daw muna siya, at baka kung meron daw siyang masabi na ikaka-react na naman ng kabilang kampo.
Mas mabuting manahimik na lang daw muna siya. Pero inamin niyang wala naman siyang komunikasyon sa kanyang mga anak, at hindi pa niya sila nakikita uli.
- Latest
