Mr. and Ms. Olive-C Campus Model: Balik-lantaw sa nangagi, pagpangandam sa umaabot

CEBU, Philippines - Sa miaging tulo ka tuig, nahimugso ang nasudnong campus-based beauty and brain modelling pageant nga Mr. and Ms. Olive-C Campus Model Philippines nga dinhi pa gyud sa Siyudad sa Sugbo nagsugod niadtong 2009. Naghatag kini’g kahigayonan sa mga teenager nga estudyante nga mapadayag ang ilang katakos sa pagrampa sa entablado pinasigarbo ang nagkalain-laing senina nga mugna sa mga sikat nga fashion designer. Dinhi usab nila ipabuhagay ang kalantip sa ilang salabutan pinaagi sa pagtubag sa bug-at nga mga pangutana atol sa question and answer portion. Gawas niini, gitudloan usab sila sa pag-develop sa ilang social responsibility pinaagi sa pag-apil sa nagkadaiyang kalihokan sama sa community immersion, coastal cleanup, tree planting, ug volunteerism.

Gihitsas usab ang ilang personal development pinaagi sa paghatag kanila sa mga personality training ug workshop, pagsalang kanila sa radio ug TV guesting, ug pagbansay kanila sa mga basic life skills. Dako kini’g natabang aron molig-on ang ilang kompyansa sa kaugalingon ug nakat-on sila nga mahimong independent ug self-sufficient.

Asa na ba karon ang mga nangaging Mr. and Ms. Olive-C Campus Model? Si Muriel Orais, ang Sugbuanon ug labing unang female winner atoa na sa kaulohan. Nakadaug siya nga second runner-up kon Ms. Philippines Water sa Ms. Philippines-Earth 2011. Ang iyang pares nga si Hiro Peralta anaa karon ubos sa GMA Artist Center ug usa sa mga main cast sa Anna Karenina. Si Jon Lucas anaa ubos sa pagdumala sa ABS-CBN Star Magic Center ug nahiapil kaniadto sa Kahit Konting Pagtingin nga gibituonan ni Angeline Quinto. Si Rohama Rearte usa na ka hanas nga corporate-event host. Silang duha ang mananaug niadtong 2012.

Ang mga grand winner karong tuiga nga sila si Joefel Alas ug Chelsea Starling nagbansay-bansay na usab aron pagsulod sa showbiz. Panaad ni Psalmstre CEO Jim Acosta nga andam ang iyang kompanya sa pagtabang sa mga Olive-C winner aron mahatagan og katumanan ang ilang pangandoy nga makasulod sa natad sa showbiz.

Septiyembre na, nagpasabot nga Olive-C season na usab dinhi sa Sugbo. Subay niini, modawat na sugod karon ang Creworks Asia, ang Mr. and Ms. Olive-C organizer, sa mga application sa mga Sugbuanong buot mosunod nga mamahimong mga Olive-C campus model. Bukas kining maong kompetisyon alang sa tanang estudyante sa high school ug college nga nagpangidaron og 14 hangtod 20 anyos, 5’4 ang height sa babaye ug 5’6 sa lalaki, ug may nindot nga pamanit.

Daghang mga benepisyo ang madawat sa mapili nga official candidates. Kini naglakip sa personality development trainings, corporate presents, media exposure, community involvement, ug daghan pang uban. Busa giawhag ang tanang mga interesado sa pagkontak sa 09103052328 / 09056987153 o e-mail sa [email protected] alang sa mga importanteng kasayoran. Gilauman nga mas bongga ug mas dako pa ang produksyon karon nga ania na kini sa iyang ikaupat nga edisyon.