Bianca ug SONA!

CEBU, Philippines - Si Bianca Gonzales maoy pambato sa Rogue magazine karong buwana. Hugyaw ang hulagway sa cover gumikan kay gipalili ni Bianca ang ngilit sa iyang sampot. Pero mas hugyaw ang artikulo sanglit ang award-winning broadcast journalist nga si Karen Davila ang misuwat nga giulohan og “Bianca  Gonzales and the State Of The Nation.

Iñigo gitambagan ni Piolo

Gitambagan ni Piolo Pascual ang iyang anak nga si  Iñigo nga humanon una niini ang pagtungha sa dili pa kini mosulod sa showbiz.

  Hinuon iyaha kining suportahan kung dili na gyud kapugngan ni Iñigo nga mag-artista sanglit  adunay katungod ang iyang anak sa pag-umol og desisyon nga makalipay kaniya.

“Kapag 18 na 'yan, hindi mo na mapipigilan 'yan. If you ask me, of course, I want him to finish college first so he will have a degree, something to fall back on. Iba 'yung kahit paano may knowledge ka. Kahit paano marunong kang humarap sa tao na may nalalaman ka," suma pa ni Piolo ngadto sa ABS-CBN News.

Nasuta ni Tom

Tsika pa ni Tom Rodriguez nga gumikan sa role niya nga closet gay  sa My Husband's Lover, na-feel niya nga dili diay lalim ang mga kaagi sa tawo nga magtago-tago sa istado sa ilang kaugalingon. Suma pa ni Tom nga nindot diay paminawon kung wala ka’y gitago ngadto sa imong isigkatawo.

Rocky gireklamo

Nag-atubang karon og kasong malicious mischief ang character actor nga si Rocky Gutierrez human siya gireklamo sa duha ka tech journalists og vandalism. Mireklamo sila si Yahoo! Philippines tech editor Alora Uy ug  ang gadget consultant nga si Ramon Lopez gumikan kay matud pa gisuwat-suwatan ni Rocky ug sa uyab niini ang ilang sakyanan nga ilang gi-park sa parking area sa  usa ka condominium building kung diin nagpuyo ang aktor.

Tutti na-crush ni Kathryn

Giangkon sa bokalista sa bandang 6Cyclemind nga si Tutti Caringal nga na-crush siya ngadto kang Kathryn Bernardo. Nabatyagan niya ang kaanyag ni Kathryn sa dihang ni-guest siya niadto sa Sunday musical variety show sa ABS-CBN nga ASAP. Giklaro hinuon ni Tutti nga wala na siya’y plano nga modiskarte kang Kathryn gumikan kay maikog siya kang Daniel Padilla.

Nagpakahilom lang

Dili mohatag og direkta nga tubag ang TV5 President nga si Noel Lorenzana sa isyu nga matud pa gius-usan ang  talent fee sa mga Kapatid stars gumikan sa cost cutting scheme sa  TV5 management.

Laing programa

Nangita na lang karon og laing klase nga programa  ang  TV5 human wala modayon pagbalhin kanila si Ogie Alcasid. Nasayran nga giandaman diay unta si Ogie og programa sa TV 5 apan kalit lang nakahukom ang singer nga magpabilin sa GMA-7.

Petsa sa hearing

Gikatakda karong  June 19 ang pre-trial sa kaso nga gipasaka ni Ai-Ai delas Alas batok sa bana niya nga si Jed Salang kinsa gihulagway niya nga kusog modapat sa higayon nga mag-away silang duha. Gusto ni Ai-Ai nga hingpit na gyud nga dili makaduol kaniya si Jed.

Ryan Seacrest nisuporta ni Charice

Malipayon gipahibalo ni Charice nga ubay-ubay na ka mga dagkong personalidad ang nagpakita og suporta kaniya sa pag-angkon niya nga usa siya ka tomboy. Usa na niini mao ang sikat nga TV host ug radio disc jockey nga si Ryan Seacrest.

Promote to the max

Gitataw ni Charice nga mahimo ra siya nga makatikang og bisan asa nga network busa maka-promote siya og todo sa umaabot niya nga album. Gipamatud-an ni  Charice nga dili babag sa iyang music career ang iyang pagka-tomboy.

Nagkalig-ong relasyon

Gipakita  na nila ni Yael Yuzon ug  Karylle ngadto sa publiko kung unsa kalig-on ang ilang relasyon. Sweet kaayo ang duha nga nanambonng sa presscon sa  Philpop 2013 sa miaging adlaw. Malipayon ang duha gumikan kay dili suki sa intriga ang ilang relasyon.