8 sa ABS-CBN, 4 sa GMA-7!

CEBU, Philippines - Nakaangkon og 12 ka nomination ang Pilipinas sa 2011 New York Festivals TV & Film Awards. Walo ka entries niini ang iya sa ABS-CBN, samtang upat ang sa GMA-7, sa 54th edition sa tinuig nga indigay.

Balita sa Philippine Entertainment Portal, ipahigayon ang International Television & Film Awards Show didto sa Las Vegas karong April 9-14, 2011.

Nasayran nga duha ka teleserye sa ABS-CBN ang makigtigi sa soap opera El Clon sa Estados Unidos. Kini mao ang Dahil May Isang Ikaw nila ni Jericho Rosales, Kristine Hermosa, Gabby Concepcion, ug Lorna Tolentino; ug ang Magkaribal nila ni Gretchen Barretto ug Bea Alonzo.

Nominado pud ang TV Patrol alang sa Coverage of Breaking News, pinaagi sa ilang entry nga “Bloodbath in Manila,” may kalabutan sa hostage drama niadtong August 23.

Ang I Survived program ni Ces Drilon, nominado sa Docudrama category. Ang Storyline nila ni Patricia Evangelista ug Paolo Villaluna makigtigi sa tulo ka kategorya: Biography/Profiles, Community Portraits ug Social Issues/Current Events.

Samtang ang I-Witness episode sa GMA-7 nga nag-ulohan og “Paraisong Uhaw” (A Parched Land) nominado pud sa Social Issues/Current Events category.

Ang mugna sa Kapuso “Lupang Hinirang” (The Philippine National Anthem), diin ang ilang mga artista ang gibida isip national heroes, nasulod sa Music Video category.

Ang Born To Be Wild: The Born Expeditions Finale for the Nature & Wildlife category ug Biyaheng Totoo (Real Journeys) sa GMA-7 naapil pud sa Special Report category.

Gawas sa ilang mga salida, apil pud ang ABS-CBN sa Copywriting: Promotion Spot category alang sa “Altar.” Mugna kini sa Creative Communications Management sa estasyon atol sa fire prevention month.

Nasayran nga mga hurado gikan sa 35 ka mga nasud ang mga maghuhukom sa nagkadaiyang kategorya sa maong festival. (BANATNEWS)