Anne ayaw pag-usapan ang balikan nila ni Richard

Umalis kahapon si Anne Curtis for her one month vacation sa Spain at Italy, pero bago umalis, nai-launch muna noong Monday evening ang bagong TV commercial (TVC) ng GSM Blue na kanyang ini-endorse. 

Five years nang endorser ng GSM Blue si Anne, pero hindi sinagot kung nadadagdagan ang talent fee niya tuwing nagre-renew siya ng kontrata. Hindi raw siya comfortable pag-usapan ang talent fee.

Samantala, magko-concentrate si Anne sa Spain sa isang buwan niyang bakasyon at binanggit ang Mallorca, Marbella, Barcelona, Salamanca at Madrid sa mga lugar na kanyang pupuntahan. Excited ang dalaga sa kanyang trip na siya mismo ang nag-book para hindi siya maloko. Nag-aral siya ng basic Spanish and Italian para hindi siya mahirapan.

Sa kanyang pagbabalik sa June, sisimulan ni Anne ang pelikulang Maybe This Time na pagtatambalan nila ni Richard Gutierrez at co-produced ng Viva Films at GMA Films sa direksyon ni Maryo J. delos Reyes. Natawa ito nang usisain kung magkakaroon ng balikan sa kanila ni Richard at saka na raw pag-usapan pagbalik niya.

Wala pang mai-comment si Anne sa project ng ABS-CBN na Anak ni Zuma dahil wala pang sinasabi sa kanya. Hindi rin nito alam kung kailan ang airing ng The Wedding.

* * *

Nag-first shooting day noong Lunes sina Marian Rivera at Dennis Trillo ng horror-drama movie nila sa Regal Entertainment na Tarot sa direksiyon ni Jun Lana. Kasama rin sa cast sina Gloria Romero, Gina Alajar, Anna Capri, Dante Rivero, Liza Lorena, Roxanne Guinoo at Celia Rodriguez.

Sa Jusmag area, bridal shop ni Renee Salud at sa Sagrada Familia church sa Roxas District kinunan ang mga naunang eksena ng pelikula. Second movie na ito nina Marian at Dennis dahil nagkasama rin sila sa Pamahiin ng Regal pa rin.

Halloween presentation daw ito kaya kundi last week ng October ay first week ng November ang showing. Gagawin ni Marian ang movie habang hindi pa siya nagsisimulang mag-taping para sa Darna, pero mauuna raw ipalabas ang movie nila ni Vhong Navarro na ’di pa alam kung kailan ang shooting.

Masakit man sa mga fans nina Marian at Dingdong Dantes, kailangan nilang tanggapin na hindi muna magsasama sa telebisyon at pelikula ang dalawa.

* * *

Hindi pa bumabalik sa kanyang radio show sa ABS-CBN si Ted Failon and the moment bumalik ito, si Korina Sanchez naman ang magli-leave. Bukod sa sasamahan si Sen. Mar Roxas sa kanyang Padyak Caravan, sisimulan na raw ni Korina ang paghahanda sa wedding nila ng senador na kundi sa July ay sa September this year.

Tsika sa amin ng isang kaibigan, noong nasa Davao sina Sen. Mar at Korina para sa Padyak Caravan, biglang nawala si Korina at nang tawagan ng senador, nalamang nasa isang orchid farm at tila humingi raw ng tips kung paano magagamit ang orchid sa wedding ceremony.