Paskang alegreha! Aw, kinsakahay di maratol noh, kun di damhon nga mahimamat nimo sa personal ang usa sa mga sikat ug ngilngig nga mag-aawit dili lang dinhi sa Pilipinas, kundili, ngadto na sa gawas sa nasod!
Bitaw, pwerte gyong hugyawa ug morag mga hulmigas nga naukay ang mga taga opisina ug trabahante sa Detalia Aurora dihang wa damha nga nahasuroy ang inilang mag-aawit nga si Kuh Ledesma niadtong Miyerkules, petsa 2 sa Abril ning tuiga. Ang Detalia Aurora usa ka manufacturing company nga tiggama ug exporter sa de-kalidad nga mga muebles kon high end quality furniture ug naa mahimutang sa barangay Paknaan, sakop sa dakbayan sa Mandaue. Ang nahisgotang kompaniya ilado na kaayo ug maoy paboritong bisitahon sa mga lokal ug foreign buyers gumikan sa taas nga kalidad sa mga produkto niini. Maoy hinungdan nga mituyo pero hilom nga miadto ang sikat nga singer uban sa iyang anak dalaga nga si Isabela aron motan-aw ug mamili sa mga display nga furniture designs and accesories nga produkto sa Detalia Aurora.
Wa nabaniog sa publiko o nabutyag sa taga media ang pag-anhi ni Kuh Ledesma sa Sugbu. Hilom, mingaw, walay timik. Dili sama kabanha sa kisaw matag higayon nga moanhi dinhi sa Queen City of the South si boxing superstar Manny Pacquiao. Apan kun nagtuo ta nga ang mga sikat o inila ganahan pirme nga mapansin sa mga tawo, pero sa tinuod lang tingali, gikapoy na sad ni sila nga sa matag lakaw o lihok nila, naay kanunay’ng mag-ikog-ikog o nagsunod-sunod nga kamera. Mao nga aron dunay privacy ug aron paglikay nga sila dumogon sa ilang magdadayeg, tuyoon nila usahay nga dili sila mailhan. Pag-adto ni Kuh Ledesma sa Detalia Aurora, wa gyod dayo’y nakaila niya. Morag wala lang ang mga empleyado’g empleyada. Deadma! Ang-ang kay nagsul-ob man og dark Ray Ban aviator ang sikat nga singer unya nagpurong-purong pa gyod og panyo nga dunay pintik-pintik nga puti. Pero dihang iya nang gihuslo ang bildo nga nagtabon sa mga mata niyang ang panan-aw mora gyog nagdala’g kamher, sus, pwerte laging gubota sa mga tawo sulod sa opisina. Mora gyog nakakitag abat... abat nuon nga gwafa..(ha ha ha)..! Kagwafa nga bisan tataw nang naa na sa pangedarong dul-an o sobra ba kaha sa 40, kun atong ikomparar sa lugas sa humay (nga nagnihit rong panahona) sama pananglit sa Ganador, Sinandomeng, Japanese rice, etcetera.., makailad gihapon ang hitsura ni Kuh Ledesma nga anaa gihapon sa twenty something..(oh see..he he he).
Dili na bag-o apan kun maghisgot man gani ta og high end quality furniture and furnishing, nahimo nang maoy usa sa paboritongdestinasyon sa mga lokal ug langyaw’ngcelebrities ang Sugbu. Gani naningkamot man ang kadagkoan sa maong industriya nga mahimong Milan of Asia ang Sugbu. Kini tungod sa uniqueness and innovative use sa atong mga indigenous materials nga giaplay sa atong mga talented ug creative designers pag-design og mga furniture items. Kinsay malimot kang Hollywood star Brad Pitt nga dunay koleksiyon sa mga furniture nga gidesinyo ni Kenneth Cobonque, angSugboanong multi-awarded furniture designer kinsa didto naedukar sa Pratt Institute sa New York ug karon dili lang inila sa tibuok Asya, kundili, ilado ug respetado kaayo sa hut-ong sa banggiitang mga designers sa Uropa ug Amerika partikular na sa Milan, Italy ug Koln, Germany. Pipila lang usab ang nasayod nga ang 1969 Mr. Universe ug sikat nga aktor sa Hollywood nga karon gobernador sa California, U.S.A. nga si Arnold Schwarzenegger, dinhi usab sa Sugbo nangompra og mga muebles nga gigamit sa setting sa usa sa iyang mi-hit nga salida nga mao ang “Eraser”.
Pero taym pa ha, naghisgot na man hinuon ta ani og salida. Na hala, balik ta kang Kuh Ledesma nga mibisita didto’s Detalia Aurora. Ug mao na to, piktyur-piktyur dayon ang mga artistahon pod og nawong nga mga empleyada sa Detalia Aurora uban sa wa damhang sikat nga bisita. Pagkahuman, yano lang nga mibiya si Kuh ug iyang anak nga kun imong tan-awon, wa gyoy hilas, feeling dili sikat ug pabiling makab-ot sa mga fans bisan pa man sa kahabog na sa nakawhat nga kalamposan.
