Roxanne, Out na gyud!

Labihan nga nakahilak ni Roxanne Guinoo kagahapon human siya nasayod nga tangtang na siya sa noontime show ni Willie Revillame, ang Wowowee.

Suma pa sa taho sa PEP kagabii, nanirado sa kwarto si Roxanne, bisan ang iyang uyab nga si Jake Cuenca nga miadto sa studio kagahapon aron pag-am-am niya, walay nahimo.

Kalit ang maong balita alang ni Roxanne tungod kay kagahapon lang sa balita sa Banat Hugyaw gipaneguro pa niya nga dili siya matangtang sa maong noontime show, ug bisan kapoy siya tungod sa taping sa Natutulog Ba Ang Diyos?, wala maapektuhi ang iyang trabaho.

Apan ang tinubdan sa PEP nagkanayon nga dugay nang gipahibawo sa handler ni Roxanne ang maong balita, apan kagahapon pa nasayud ang dalaga niini.

Gitumbok nga ang schedule gyud maoy nakaingon sa iyang pagkatangtang, sanglit binuntagay ang taping niya sa Natutulog hinungdan nga inig abot niya sa studio, magduka pa siya. Gani matug na lang ang dalaga sa dressing room ug pukawon na lang kun kinahanglanon na siya sa stage.

Naluoy na niya si Willie matud pa, hinungdan nga pahulman na lang niya ang iyang folding bed sa dalaga aron makatarong kini og pahuway. Kanunay usab nga dili adam muabot si Roxanne, gani sa studio na kini maligo, sukwahi niadto nga preparado na siya inig tekang niya sa set.

Gawas sa Natutulog gikatahong apil usab si Roxanne sa umaabot nga show sa ABS-CBN, ang Lastikman.