Si Judy Ann pa rin sa ‘Mano Po 3’!

It’s final, hindi rin pala nasulot ng kung sino mang gustong manulot, ang role ni Judy Ann Santos sa Mano Po 3. Siya pa rin ang kasali sa pelikulang yon at hindi si Sheryl Cruz, at kagaya nga ng demand ng kanyang manager na si Alfie Lorenzo, there is no role for Sheryl in the movie, kahit na walk on part lang.

May nasabi pa sa amin ang manager ni Juday, noon daw meeting nila ay nagulat pa siya dahil sinasabi sa kanya na hindi naman dapat maging issue yon kasi ni hindi nga nila naisip na isama si Sheryl sa pelikula. Ano yon, nag-iilusyon lang ang nagsabing kasali siya sa pelikulang yon?

Duda naman kami roon. Kasi hindi naman siguro maiisipan ng kung sino man ang nagkalat na kasali nga si Sheryl Cruz sa pelikulang yon kung walang nagsabi sa kanya, o nangako na masusulot nila ang role ni Juday. Isipin ninyo, maski na nga si Vilma Santos na bida sa pelikula, hinihingan na ng opinyon kung sino ang mas gusto niyang makasama kina Sheryl at Juday. Sa palagay namin, talagang may basehan ang tsismis, eh nito na nga lang nakita nilang talagang firm ang kampo nina Juday na hindi na lang nila gagawin ang pelikula kung kasama si Sheryl kaya nila sinasabi ang ganyan.

Isipin mo nga naman kung pawawalan nila ang unang pelikula na magkakasama sina Juday at Sheryl, eh di para silang manok na nagtampo sa palay. Tapos kung gagawin yon ng iba, eh di nagsising alipin pa sila.

Kaya sa palagay namin, dapat makuntento na lang muna si Sheryl Cruz sa mga paglabas-labas sa tv dahil wala pa naman siyang pelikulang nakalinya kung di yan ngang sinasabi nilang Mano Po 3, na ngayon pala ay hindi na siya kasali.

* * *

Doon mismo sa lugar kung saan ipinanganak si Kuya Germs, nagpunta siya at nagkwento tungkol sa kanyang kabataan. Binalikan din niya ang pag-aaral niya sa Balagtas Elementary School, at saka doon sa harap ng dating Clover Theater na giniba na ngayon at tinatayuan na ng Feati University sa Santa Cruz.

Matatapos ang kwento niya nang mapasok siya sa showbusiness, at ang una nga niyang trabaho bilang bahagi ng entablado ay ang pagiging isang telonero. Sa parteng yon ay ipakikitang binabatak niya ang malaking telon sa entablado sa Broadway Studios ng Channel 7 na ipinagawa niya mismo para sa re-enactment ng dati niyang trabaho.

Ganyan ang magiging simula ng kanyang first birthday presentation sa Master Showman Presents sa Oktubre 2. Dadaluhan din yon ng lahat ng mga malalaking artista ng vaudeville noong araw, at mga sikat na singers natin ngayon na gagawa rin ng mga vaudeville numbers. Tapos ang highlight ay ang pagbibigay niya ng vaudeville awards, na kung tutuusin siya lang naman ang may karapatang magbigay talaga.

Magiging co-host niya sa nasabing show si Pilita Corrales.

Talagang pinaghahandaan ng husto ang show na yan, bagamat ang kanyang birthday special ay tatagal ng isang buwan. Ang isa pang malaking special sa kanyang show ay iyong Pista sa Nayon, kung saan talagang magkakaroon ng barrio fiesta sa loob ng studio. Filipiniana night naman yon.