Sino si Robin?
Karaniwan nating naririnig ang pangalang Robin sa mga libro, pelikula, telebisyon at komiks. Pinakakilala marahil ang Robin na sidekick ni Batman. Mayroon ding Robin Hood, ang maalamat na tauhan sa panitikang Ingles na inilalarawan bilang mahusay na mamamana. May Christopher Robin naman sa Winnie-the-Pooh at Robin Williams, ang tanyag na Amerikanong aktor at komedyante.
Ngunit saan nga ba nagmula ang pangalang Robin?
Ang Robin ay orihinal na palayaw o anyong pantawag sa Robert. Nagmula ito sa medieval English na Robin, na hinango naman sa Old French na Robin, isang diminutive o mapagmahal na anyo ng Robert. Ang Robert ay nagmula sa sinaunang pangalang Germanic na Hrodberht, na ang kahulugan ay may kaugnayan sa “maliwanag na katanyagan” o “maningning na karangalan.” Sa kalaunan, naging isang ganap na pangalan ang Robin at hindi na lamang palayaw ng Robert.
Bagaman unang ginamit bilang pangalang panlalaki, naging unisex na ang Robin, lalo na sa mga bansang nagsasalita ng Ingles. May mga babae ring tinatawag na Robin. May iba’t ibang anyo rin ito gaya ng Rob, Robyn, Robbin, Robine, Robynne at Robbyn. Ginagamit din ang Robin bilang apelyido, lalo na sa ilang bahagi ng Europe, kabilang ang France.
Dito sa Pilipinas, bagaman may mga gumagamit ng pangalang Robin, hindi ito kabilang sa mga karaniwang pangalan. Karamihan sa mga gumagamit nito sa bansa ay lalaki. Kaya hindi kataka-takang pamilyar sa mga Pinoy ang pangalang ito, lalo na dahil sa mga kilalang personalidad na Robin ang pangalan.
Maraming impormasyon ang lumilitaw kapag hinanap ang salitang Robin dahil pangalan din ito ng ilang uri ng mga ibon sa Europe, United States at Australia.
Mayroon ding mga ibong tinatawag na Robin sa Pilipinas, bagaman hindi sila kapareho ng European o American robin. Isa rito ang Bagobo Robin, na kilala ngayon sa siyentipikong pangalang Leonardina woodi. Endemic ito sa Pilipinas at matatagpuan sa Mindanao. Sa kasalukuyang taxonomy, mas kilala ito bilang Bagobo Babbler, bagaman ginagamit pa rin sa ilang bird references ang pangalang Bagobo Robin.
Mayroon ding Philippine Magpie-Robin, Copsychus mindanensis, isang endemic na ibon sa Pilipinas. Dati itong itinuring na subspecies ng Oriental Magpie-Robin ngunit kinikilala na ngayon bilang hiwalay na species sa ilang modernong taxonomic references.
Kaya kung ang tanong ay “Sino si Robin?”, walang iisang sagot. Maaari siyang maging pangalan ng isang tao, isang tauhan sa kuwento, isang bayani sa alamat, isang superhero sidekick o pangalan ng isang ibon.
At sa Pilipinas, maaaring siya pa nga ay isang Robin na hindi lamang pangalan ng tao kundi pangalan din ng isang ibong katutubo sa ating bansa.
* * * * * * * * * *
Email-[email protected]
- Latest
