Co-maker, magbabayad ba kahit hindi nakinabang sa inutang?

Dear Attorney,

Nakikiusap po ang ka­patid­ ko na pumirma ako bilang co-maker sa loan niya. Kung sakali po ba na hindi siya magbayad ay puwede ba akong habulin kahit hindi naman ako naki­nabang sa inutang niyang halaga?—Tina

Dear Tina,

Oo, puwede kang habulin kung hindi makabayad ang kapatid mo kahit pa hindi ka nakinabang sa inutang niya dahil ang silbi ng co-maker ay ang managot sa halagang hiniram sakaling hindi makabayad ang pangunahing nangu­tang.

Magkaiba lang kung kailan ka mananagot at ito ay depende kung isa kang surety o guarantor sa pipirmahan niyong loan agreement. Kung ikaw ay surety, maari ka nang habulin kaagad kapag hindi nakapagbayad ang ka­patid mo.

Kung guarantor naman, maari ka lamang papanagutin sa utang ng iyong kapatid kung wala na siyang kahit anong ari-arian na maaring sumagot para sa kanyang inutang.

Kailangan mong pag-isipang mabuti ang pagpirma bilang co-maker dahil maging surety ka man o guarantor, tiyak na magkakaroon ka ng obligasyong managot sa utang ng iyong kapatid kahit pa sabihin mong hindi ka naman naki­nabang sa halaga na kanyang hiniram.