EDITORYAL - Huwag maging kampante sa banta ng terorismo

MARAMI nang karanasan ang bansa sa kamay ng mga terorista. Hindi na mawawala sa alaala ng mamamayan ang Rizal Day bombing noong Dis. 30, 2000 na ikinamatay ng 22 katao at ikinasugat ng 100. Limang sunud-sunod na pambobomba ang isinagawa sa Metro Manila na ang pinakamalubha ay ang LRT bombing. Tinaniman ng bomba ang train na galing Baclaran at pagdating sa Blumentritt Station sa Maynila, sumabog ang bomba na maraming namatay karamihan ay mga namili ng ihahanda para sa pagsalubong sa Bagong Taon. Nang mahawi ang usok, tumambad ang maraming patay. Abu Sayyaf ang nasa likod ng pambobomba.

Noong Peb. 27, 2004, binomba ang Superferry habang naglalayag patungong Cagayan de Oro City na ikinamatay ng 116 katao. Ito ang pinakamalagim na ginawa ng mga terorista. Ayon sa report, inilagay ang 3.6 kilogram na bomba sa loob ng isang TV set at ipinatong sa deck kung saan maraming pasahero. Kagagawan ng Abu Sayyaf ang pambobomba.

Nasundan iyon ng pambobomba (Valentine bom-bing) sa isang bus sa Makati City noong Peb. 14, 2005 na ikinamatay ng limang pasahero at pagkasugat ng 13 iba pa. Kagagawan din ng Abu Sayyaf ang pambobomba.

Noong Lunes, nagpalabas ng terror attack advisory ang Japan laban sa mga bansa sa Southeast Asia na kinabibilangan ng Pilipinas. Ang advisory ay ginawa ilang araw makaraang gunitain ang ika-17 anibersaryo ng 9/11 terrorist attack sa United States. Tatlong eroplano ang kinumander ng mga terorista at ang dalawa ay ibinangga sa World Trade Center at ang isa ay sa The Pentagon.

Ang terror attack advisory ng Japan ay hindi dapat ipagwalambahala sapagkat ang mga terorista ay naghihintay lamang ng pagkakataon para su-malakay. Maging alerto ang mga awtoridad. Maging mapagmatyag sa mga taong kahina-hinala ang kilos. Sasamantahalahin ng mga terorista ang pagkakataon na ang mamamayan ay tuliro habang nakikipaglaban sa pandemya. Huwag hayaang manaig ang masamang layunin ng mga terorista. Makipagtulungan ang mamamayan para madakip at maparusahan ang mga “uhaw sa dugo”.