Preso sa Kosovo, nilunok ang ipinuslit na cell phone
MATAGUMPAY na nakuha ng isang surgeon sa Kosovo ang isang cell phone mula sa tiyan ng isang preso roon.
Hindi na kinilala ang 33-anyos na preso, na ilang araw nang dumadaing ng pananakit ng tiyan kaya siya ay in-admit na sa Pristina University Hospital.
Matapos suriin ang preso, napag-alaman ng mga doktor na nilulon pala nito ang Nokia 3310 cell phone, ayon kay Skender Telaku na namuno sa medical team na nagsagawa ng operasyon.
Nagawa nilang makuha ang cell phone mula sa tiyan ng preso ng hindi binubuksan ang kanyang katawan sa pamamagitan ng tinatawag na endoscopy.
Kinailangan ng mga doktor na hatiin sa tatlo ang cell phone upang makuha ito mula sa tiyan ng preso
Ayon sa mga doctor, sa battery ng cell phone sila pinakanabahala. Naglalaman kasi ito ng mga asido na maaring tumunaw sa tiyan at bituka. Mabuti na nga lang daw at walang naging komplikasyon matapos ang operasyon at matagumpay nilang nakuha ang cell phone.
Hanggang ngayon, inaalam pa kung paano naipuslit ang cell phone at kung bakit kinailangang lulunin ito ng preso.
- Latest