Pinakamataas na bamboo statue sa mundo, matatagpuan sa Pilipinas

ISANG istatwa ng santo sa Pilipinas na may taas na 164 feet, 9 inches, ang kinilala ng Guinness World Record na pinakamataas na bamboo sculpture sa mundo.

Sinukat mismo ng Guinness ang istatwa ni St. Vincent Ferrer na matatagpuan sa St. Vincent Ferrer Prayer Park sa Bayambang, Pangasinan bago nila ito opisyal na kinilalang pinakamataas na iskultura sa mundo na gawa sa kawayan.

Inisponsoran ng mga mamamayan ng Bayambang at ng Kasama Kita Sa Barangay Foundation ang istatwa, na inabot ng isa’t kalahating taon ang pagtatayo mula sa 22,626 bamboo panels o katumbas ng 60 tonelada ng kawayan.

Ginawa ang istatwa bilang bahagi ng selebrasyon ng ika-400 anibersaryo ng parokya  ni St. Vincent Ferrer, na patron ng Bayambang.