Generika-Ayala nilusutan ang Smart Prepaid via five-set victory
Nailusot ni Rhea Meneses ng Generika-Ayala ang kanyang spike laban kina Jenine Delos Reyes at Maureen Penetrante-Ouano ng Smart.
Laro Bukas (The Arena, San Juan City)
4:15 p.m. Foton vs Cignal
7 p.m. Petron vs Cocolife
MANILA, Philippines — Napigilan ng Generika-Ayala ang paghahabol ng Smart Prepaid upang itakas ang 25-21, 25-23, 23-25, 22-25, 15-11 desisyon tungo sa kanilang unang panalo sa Philippine Superliga Grand Prix kahapon sa Imus Sports Center sa Imus City, Cavite.
Minanduhan nina imports Darlene Ramdin ng Trinidad and Tobago at Symone Hayden ng Amerika ang opensa ng Lifesavers na humataw ng kabuuang 69 attacks sa larong tumagal ng dalawang oras at 26 minuto.
Nakatuwang ng dalawang reinforcements si local middle hitter Marivic Meneses na kumamada ng 13 attacks at tatlong blocks para tulungan ang Generika-Ayala na sumampa sa win column.
Nasayang ang pinaghirapan nina Sanja Tribunovic at Gyselle Silva para sa Giga Hitters na lumasap ng ika-limang sunod na kamalasan.
Nakagawa ng 59 kills ang Smart Prepaid karamihan ay mula kina Silva at Tribunovic, habang lamang rin ang kanilang tropa sa blocking department matapos kumana ng 12 laban sa walo ng Generika-Ayala.
Parehong may pitong aces ang dalawang tropa at hindi rin nalalayo ang kanilang unforced errors kung saan nagkamali ang Lifesavers ng 27 beses habang may 26 mintis naman ang Giga Hitters.
Hawak ang 2-0 bentahe, naging kampante ang Generika-Ayala sa ikatlong kanto nang hayaan nitong umariba ng husto sina Silva at Tribunovic para makuha ang mga sumunod na sets at maitabla ng Smart Prepaid ang laban sa 2-2.
Nagawa pang makatabla ng Giga Hitters sa fifth set mula sa cross court attack ni Tribunovic.
- Latest
