Konsehal arestado sa baril at mga bala

MANILA, Philippines — Isang 48-anyos na incumbent municipal councilor ang inaresto ng mga otoridad dahil sa mga hindi lisensyadong baril sa isang police operation sa Barangay Poblacion sa Tampilisan, Zamboanga del Norte nitong Martes, August 26.

Kinilala ng Criminal Investigation and Detection Group ang suspek na si Julius Darunday Bomediano,miyembro ng Sangguniang Bayan ng Tampilisan na dating mayor.

Sa ulat nitong Huwebes ni Brig. Gen. Eleazar Matta, director ng Police Regional Office-9, nagsagawa ng search operation sa bahay ni Bomediano ang mga operatiba ng CIDG-Zamboanga del Norte at mga units ng PRO-9 sa probinsya.

Natagpuan ng police search team sa loob ng bahay ni Bomediano ang isang M16 combat rifle at isang .45 caliber pistol na pawang walang mga lisensiya at kinasuhan ng illegal possession of firearms.