Bulkang Kanlaon, nakataas sa alert level 1
MANILA, Philippines — Nakataas na sa alert level 1 ang Bulkang Kanlaon sa Negros makaraan ang sunud-sunod na pag-aalboroto nito, kahapon.
Ayon sa Philippine Institute of Volcanology and Seismology (Phivolcs), bukod sa mga volcanic earthquake na naitala, nagkaroon din ng mahinang pagsingaw ng usok sa bunganga ng bulkan na may 100-metrong taas.
Sinabi pa ng Phivolcs na nakitaan din ng pamamaga ang bunganga ng bulkan na senyales ng pag-aalboroto.
Bunsod nito, mahigpit na ipinagbabawal ng Phivolcs ang pagpasok ng sinuman sa 4-kilometrong radius Permanent Danger Zone (PDZ) ng bulkan.
Sinabi pa ng ahensya na bawal din ang pagpapalipad ng anumang uri ng aircraft malapit sa tuktok ng bulkan dahil sa banta ng pagsabog.
Ang bulkang Kanlaon ay itinuturing na aktibong bulkan dahil sa mga nakalipas na pag-aalboroto nito na matatagpuan sa mga lalawigan ng Negros Occidental at Negros Oriental.
- Latest