No. 8 ‘most wanted’ sa Calabarzon, nalambat
CAMP VICENTE LIM, Laguna, Philippines — Matapos ang 16 taon na pagtatago, bumagsak na sa kamay ng mga awtoridad ang pangunahing suspek sa pagpatay sa isang babae noong 2005 sa Batangas at nakatala bilang number 8 Most Wanted Person (MWP) sa Calabarzon.
Ayon kay Col. Glicerio Cansilao, Batangas police director, ang MWP na si Bayani Manguera, 76, ay naaresto ng joint forces ng Lemery Police at Regional Intelligence Unit-Mimaropa Region sa kanyang pinagtataguan sa Barangay Bayanan, Pola, Oriental Mindoro, noong Lunes ng hapon.
Sa report ni Oriental Mindoro police director, Col. Renante Cabico, sinabi nito na si Manguerra ay dinakip sa bisa ng warrant of arrest na inisyu ng Regional Trial Court, Branch 5 sa Lemery, Batangas na may petsang Hunyo 19, 2006 sa kasong murder na walang inirekomendang piyansa.
Sinabi ni Cansilao na ang kirmen ay naganap noong Hunyo 7, 2005 sa General Luna St. corner Independencia St. Barangay District 3, Lemery, Batangas kung saan binaril sa ulo at napatay ng nasabing akusado ang biktimang si Divina Nava Cornelio.
- Latest
