Salpukan ng 2 motorsiklo: Rider nasawi, 1 pa kritikal

CAVITE, Philippines — Patay ang rider habang nasa kritikal na kondisyon ang isang binata matapos silang magsalpukan habang kapwa lulan ng motorsiklo sa kahabaan ng Brgy. San Roque, Naic, Cavite kahapon ng madaling araw.

Parehong nagtamo ng matinding pinsala sa ulo ang dalawang driver na agad ikinamatay ng biktimang si Dennis Gonzales Claros, 44-anyos, may asawa, factory worker at residente ng Naic, Cavite habang inoobserbahan sa Gen. E. Aguinaldo Hospital ang nakasalpukan nitong si Charles Kevin Cañete Arabe, 21, ng Naic Cavite.

Sa imbestigasyon ni P/Staff Sgt. Richard F. Atienza ng Naic Police, dakong ala-1:35 ng madaling araw habang kapwa bumabagtas at may kabilisan ang patakbo sa motorsiklo ng dalawang biktima sa kalsada ng Brgy. San Roque nang maganap ang aksidente.

Minamaneho umano ni Claros ang isang Raider motorcycle na walang plaka at patungong Naic town proper nang makasalpukan ang kasalubong na Suzuki Smash motorcycle ni Arabe.

Dahil sa sobrang lakas ng impact, tumilapon ang dalawang biktima at parehong napuruhan sa ulo. Agad silang itinakbo ng mga reponders subalit idineklarang dead-on-arrival si Gonzales habang hindi pa rin nagkakamalay ang isa pa hanggang sa kasalukuyan.