Magpinsan todas sa ambush sa Quezon
TIAONG, Quezon, Philippines — Pinagbabaril hanggang sa mapatay ng mga ‘di kilalang salarin ang magpinsan na ang isa rito ay suspek sa pamamaril kamakalawa ng umaga sa Sitio Tabura Silangan, Barangay Del Rosario ng bayang ito.
Kinilala ng pulisya ang mga biktima na sina Manuel Roxas alyas “Awel”, 51, may-asawa at suspek sa pamamaril noong Pebrero 12, 2022 at Randy Roxas, 26, kapwa naninirahan sa Barangay Lusacan, Tiaong.
Tinutugis na ng pulisya ang mga suspek na nakilalang sina Frederick Renton, ng Candelaria at Allan Oliveros ng Barangay Del Rosario sa bayang ito.
Ayon sa imbestigasyon, bandang alas-10:45 ng umaga ay magkaangkas sa motorsiklo na dumating sa kakahuyan ang magpinsan na lingid sa kanilang kaalaman ay nag-aabang na ang mga suspek. Pagkakita sa mga biktima ay agad silang pinaulanan ng punglo ng mga salarin at nang matiyak na patay na ay tinangay pa sa kanilang pagtakas ang sling bag ni Randy.
Isa sa tinitingnang anggulo ng mga imbestigador sa krimen ay paghihiganti.
- Latest