3 magkakapatid na paslit tusta sa sunog!

Lighter sa may altar, nilaro

MANILA, Philippines — Tatlong bata na magkakapatid ang nasawi makaraang makulong ng apoy sa loob ng nasusunog nilang tahanan nang maglaro ng lighter ang isa sa kanila sa isang liblib na lugar sa Brgy. Ilayang Tayuman, San Francisco, lalawigan ng Quezon nitong Biyernes ng hapon.

Kinilala ang mga nasawi na sina Shakera Villa Blagon, 5-anyos; mga kapatid na Limbert Blagon Jr., 3-anyos at Leonel, 1-taong gulang.

Sa ulat ng Quezon Police, mag-a-alas-6:00 ng gabi nang mata­nawan ng mga kapitbahay ang nagliliyab na tahanan ng pamilya Bla­gon. Nabigo na umano nilang mailigtas ang mga paslit dahil binabalot na ng apoy ang buong kabahayan.

Lumilitaw pa sa pagsisiyasat na naglaro ng lighter ang 5-anyos na si Shakera sa may altar na pinagmulan ng sunog kung saan mabilis na kumalat ang apoy dahil gawa lamang sa dahon ng buli ang bubungan ng kanilang tahanan.

Nabatid na wala sa kanilang tahanan ang mga magulang ng mga bata dahil abala umano sa pagko-copra at iniwan ang mga anak na naglalaro sa kanilang tahanan.