Empleyado ng munisipyo na ‘tulak’ nalambat
MALOLOS CITY, Bulacan, Philippines — Nagtulung-tulong ang limang istasyon ng pulisya kaya naaresto ang sinasabing madulas na “tulak” ng droga at nasamsaman ng P136,000 halaga ng pinaghihinalaang shabu sa bayan ng Marilao ng lalawigang ito, ayon sa ulat ng pulisya kahapon.
Kinilala ni Bulacan Provincial Police Office director PCol. Lawrence Cajipe ang suspek na si Michael Avendaño alyas “Pepsi”, empleyado sa Pandi Municipal Hall at residente ng Brgy. Santol, Balagtas.
Sa report, naaresto si Pepsi sa ikinasang dragnet operation ng pinagsamang puwersa ng Pandi, Sta. Maria, Bocaue, Balagtas at Marilao Police Stations sa Brgy. Abangan Sur, Marilao.
Nakumpiska sa operasyon ang 12 heat-sealed sachets na pinaghihinalaang shabu na tumimbang ng nasa 20 gramo na tinatayang nasa P136,000 ang halaga, isang Toyota Vios Sedan na may plakang ABR 8356 at mga shabu paraphernalia.
Sinasabing bago nahuli si Pepsi ay nakatakas muna siya matapos ang transaksyon sa ikinasang buy-bust operation ng Pandi Police dakong alas-10:20 am sa Brgy. Bunsuran 2nd, Pandi.
- Latest