No. 7 most wanted sa Bicol, timbog

BATO, Camarines Sur, Philippines — Dead-on-the spot ang pampito sa regional most wanted person ng Bicol at panlimang most wanted ng kanilang bayan matapos na makipagbarilan sa mga pulis na maghahain sana ng warrant of arrest laban sa kanya sa bahay nito sa Brgy.Buluang ng bayang ito kamakalawa ng umaga.

Napuruhan ng punglo sa iba’t ibang bahagi ng katawan at agad nasawi ang suspek na si Rico Gerobin, residente ng naturang lugar at kasapi ng Concepcion Criminal Gang.

Sa ulat ni Brig. Gen. Jonel Estomo, regional director ng Police Regional Office 5, dakong alas-5:15 ng umaga, bitbit ang warrant of arrest na inilabas ng Iriga Regional Trial Court Branch 34 dahil sa kasong murder at attempted murder ay magkatuwang na sinalakay ng mga tauhan ng Regional Intelligence Unit 5, Provincial Intelligence Unit, 2nd Provincial Mobile Force Company at Bato Police ang bahay ng suspek.

Gayunman, tumakbo ang suspek at bumunot ng baril saka pinutukan ang raiding team na nagbusod ng palitan ng putok at ikinasawi ng una.