Opisyal na may koneksyon sa NPA, sumuko
CAMP NAKAR, Lucena City, Philippines — Isang opisyal ng grupong ikinukonekta sa mga rebeldeng Communist Party of the Philippines/New Peoples Army (CPP/NPA) na tinaguriang Karapatan Quezon/Tanggol-Quezon ang kusang-loob na sumuko sa himpilan ng 201st Infantry (Kabalikat) Brigade, Philippine Army na nakabase sa Barangay Poblacion 10, Catanauan, Quezon, kamakalawa.
Sa ulat na nakarating kay Southern Luzon Command (SOLCOM) Commander Lt. General Antonio Parlade, kinilala ang sumuko na si Genelyn Dichoso Y Carabot (alyas Gemma) Secretary General ng Karapatan Quezon/Tanggol-Quezon.
Ang KARAPATAN ay itinatag ng armadong grupong NPA para tugunan ang kanilang pangangailangan sa pananggalang sa kasundaluhan at kapulisan sa pamamaraan ng “mga alegasyon ng mga paglabag sa karapatang pantao”.
Nang mailantad ang kanilang pamamaraan at tahasang pagpanig sa NPA, Binuo nila ang “TANGGOL QUEZON” upang malansi ang mga tao na sila ay tunay na alagad at tagamasid sa karapatang pantao laban sa alegasyon ng mga pang-abuso ng kasundaluhan at kapulisan.
Ang pagsuko ni Ka Gemma at nang ilan pang makakaliwang grupo ay isang pagpapakita na matagumpay ang layunin ng pamahalaan na tapusin ang armadong pakikibaka sa lalawigan ng Quezon at patuloy na hikayatin ang ilan pa nilang naiwang kasamahan na patuloy na nakikipaglaban sa pamahalaan.
- Latest