Higit 5,000 turista dadagsa sa Baguio

Ngayong Kapaskuhan at Bagong Taon

TUGUEGARAO CITY,  Cagayan, Philippines — Inaasahang dadagsain ng nasa 5,748 na lokal na turista ang Baguio City pagsapit ng Pasko at Bagong Taon matapos aprubahan ng City Tourism Office ang aplikasyon ng mga itong makapasok sa lungsod sa holiday season.

Ayon kay Supervising Tourism Operations Officer Aloysius Mapalo mahigit 1,600 turista ang inaasahang papasok sa Baguio sa Disyembre 23 hanggang sa bisperas ng Pasko.

Aniya 3,236 turista ang suma ng mga nakapasok na sa Baguio pagsapit ng Disyembre 26.

Ang huling bilang ng mga turistang papasok sa lungsod ay itinaas ng City government mula sa dating 1,000 bawat buwan.

Idinagdag ni Mapalo na ang mga pinahintulutang papasok sa Baguio City ay pawang pumasa sa inilatag nilang requirements upang masigurong sila ay malulusog at hindi carrier ng COVID-19.