‘Gold rush area’ sa Nueva Viscaya abandonado na
TUGUEGARAO CITY, Philippines — Tiniyak ng awtoridad kahapon na abandonado na ang “gold rush area” sa Quezon, Nueva Viscaya alinsunod sa kautusan ni Pangulong Rodrigo Duterte na itigil ang pagmimina sa lugar na nagdulot ng landslides at ikinasawi ng sampung katao noong pananalasa ng bagyong Ulysses.
Batay sa ulat na natanggap ng Pangulo, bumigay ang lupa sa kabundukan nang pasukin ng tubig ang mga tunnels na walang puknat na nilikha ng mga minerong kolorum.
Sinabi sa PSN ni Nueva Viscaya Police Director Colonel Ranser Evasco na agad nilang inilikas ang natitira pang nanunuluyan sa Sitio Compound at Sitio Bit-ang sa Barangay Runruno matapos ang pagguho ng lupa noong Huwebes.
Ayon kay Evasco, ang 10 nasawi ay pawang pamilya ng mga minerong dumayo mula sa ibat ibang lugar upang makipagsalaran sa pagkalkal ng ginto sa konsesyon ng lisensiyadong FCF mining Corporation.
Aniya, binabantayan ngayon ng pulisya ang abandonadong minahan upang masawata ang pagbalik ng mga pocket miners. Tatalakayin din ng pulisya at ng Department of Environment and Natural Resources (DENR) ang estado ng lehitimong konsesyunaryo sa lugar kung sumusunod ito sa panuntunan ng gobyerno, ayon sa direktiba ni Duterte.
- Latest