3K sibilyan nagsilikas sa bakbakan
NORTH COTABATO, Philippines — Abot sa 3,000 na sibilyan ang nagsilikas mula sa kanilang mga kabahayan nitong Linggo dahil sa takot na maipit sa muling pagsiklab ng bakbakan ng dalawang armadong grupo na ikinasawi na ng dalawa katao sa Barangay Talitay sa bayan ng Pikit, dito sa lalawigan.
Sa ulat kay Cotabato police provincial director Colonel Henry Villar, nagkasagupa ng grupo nina Kumander Ricky ng Moro Islamic Liberation Front (MILF) ang pangkat ni Kumander Butoh Sanday ng armed lawless group sa lugar, dakong alas-7:00 ng umaga.
Dahil dito, sinabi ni Pikit Municipal Disaster Risk Reduction and Management Office (MDRRMO) officer Tahira Kalantungan na mahigit 3,000 na indibiduwal na ang lumikas sa mga apektadong barangay sa Pikit. Ang mga bakwit ay pansamantalang nanunuluyan sa mga paaralan at sa kanilang mga kamag-anak sa mga ligtas na lugar.
Matatandaan na si Kumander Butoh Sanday ay dating brigade commander at G3 ng Bangsamoro Islamic Armed Forces (BIAF) ngunit pinatalsik ng MILF matapos na masangkot sa ilang kaguluhan sa lugar.
Nakisawsaw rin si Kumander Sanday sa alitan o rido nang magkalabang pamilya sa bayan ng Pikit. Hindi umano inalintana nito ang kaligtasan ng mga sibilyan sa mga nangyaring labanan at hindi na rin sumusunod sa kautusan ng liderato ng MILF.
Clan war o rido at personal na alitan ang dahilan ng panibagong labanan. Wala pang pangalan ang mga nasawi habang isa naman ang nasugatan ng ligaw na bala.
- Latest