Ikakasal sa Valentine’s Day timbog sa P9.4 milyong shabu
MANILA, Philippines — Sa kulungan ang bagsak ng mag-partner na balak sanang magpakasal kahapon, Araw ng mga Puso matapos na makuhanan ng nasa P9.4 milyong halaga ng illegal na droga kasama ang isa pa sa drug operation sa New Visayan Village, Tagum City, Davao del Norte, Huwebes ng gabi.
Kinilala ang mga naaresto na sina Bembol Rabosa Papata, 39-anyos at ang kanyang bride-to-be na si Jeanet Narcelo Saicon, 46, kapwa residente ng Pindasan, Mabini, Davao De Oro at isang Rex Jocotmaya Comaña, 28-anyos, taga-Tagum City.
Ang tatlo ay natimbog sa buy-bust operation ng Sta. Ana Police kasama ang Regional Special Operation Group (RSOG) XI at Davao City Police Office (DCPO) Intelligence Unit.
Ayon kay P/Major Michael Uyanguren, commander ng Sta. Ana Police Station, inginuso si Patata ng mga nauna nilang nadakip na drug suspect dahilan para ikasa ang nasabing operasyon.
Giit naman ni Police Col. Kirby John Kraf, pinuno ng DCPO na ito na ang pinakamalaki nilang operasyon kung saan umaabot sa 590 gramo na nagkakahalaga ng P9,440,000 ang nakuha sa SUV ng suspek sa inilatag na buy-bust.
- Latest
